मालेगाव | प्रतिनिधी
मालेगाव शहरात अल्पवयीन मुलीच्या बेकायदेशीर प्रसूतीचे आणि नवजात बालकाच्या कथित विक्रीच्या प्रयत्नाचे धक्कादायक प्रकरण समोर आले असून या प्रकरणाने वैद्यकीय क्षेत्रासह संपूर्ण जिल्ह्यात खळबळ उडाली आहे. अवघ्या १६ वर्षीय मुलीची प्रसूती करून तिच्या नवजात बाळाची ओळख लपविण्याचा प्रयत्न केल्याप्रकरणी चार डॉक्टरांसह ११ जणांविरोधात गंभीर गुन्हे दाखल करण्यात आले असून त्यापैकी ९ आरोपींना पोलिसांनी अटक केली आहे.
मिळालेल्या माहितीनुसार, अनैतिक संबंधातून गर्भवती राहिलेल्या अल्पवयीन मुलीला ३ जून रोजी शहरातील हिराई रुग्णालयात दाखल करण्यात आले होते. मुलगी अल्पवयीन असल्याची माहिती असतानाही संबंधितांनी कायदेशीर प्रक्रिया न पाळता तिची सिझेरियन शस्त्रक्रियेद्वारे प्रसूती केल्याचा आरोप आहे.
या प्रकरणात रुग्णालयाचे संचालक डॉ. किशोर डांगे आणि डॉ. किशोरी डांगे यांच्या मार्गदर्शनाखाली डॉ. अनुजा शेवाळे, डॉ. प्रीती जाधव तसेच रुग्णालयातील काही कर्मचाऱ्यांनी प्रसूतीची प्रक्रिया पार पाडल्याचा आरोप फिर्यादीत करण्यात आला आहे. विशेष म्हणजे, जन्मलेल्या बालकाची ओळख लपवून त्याची विक्री करण्याचा प्रयत्न झाल्याचा गंभीर संशयही व्यक्त करण्यात आला आहे.
दरम्यान, काही सामाजिक कार्यकर्त्यांना या संशयास्पद प्रकाराची माहिती मिळाल्यानंतर त्यांनी सामान्य रुग्णालयाचे वैद्यकीय अधिकारी डॉ. जितेंद्र डोलारे यांच्याकडे तक्रार केली. त्यानंतर करण्यात आलेल्या प्राथमिक चौकशीत अनेक धक्कादायक बाबी उघडकीस आल्या. यानंतर डॉ. डोलारे यांनी पोलिसांकडे अधिकृत फिर्याद दाखल केली.
फिर्यादीच्या आधारे पोलिसांनी अल्पवयीन मुलीला गर्भवती करणाऱ्या अज्ञात तरुणासह संजय भागवत गवळी, नंदिनी गवळी, प्रवीण देशमुख, डॉ. किशोर डांगे, डॉ. किशोरी डांगे, डॉ. अनुजा शेवाळे, डॉ. प्रीती जाधव, नवसिन रफिक शेख, मोहम्मद फईम मोहम्मद शफिक आणि सार्थक प्रवीण जगताप यांच्याविरोधात पोक्सो कायदा, बाल संरक्षण कायदे आणि अन्य गंभीर कलमांनुसार गुन्हे दाखल केले आहेत.
या प्रकरणातील दोन आरोपी अद्याप फरार असून त्यांचा शोध सुरू आहे. अटक करण्यात आलेल्या नऊ आरोपींना न्यायालयाने १२ जूनपर्यंत पोलीस कोठडी सुनावली आहे. या संपूर्ण प्रकरणाचा तपास वेगाने सुरू असून बालकाच्या कथित विक्रीच्या कोनातूनही पोलिसांकडून सखोल चौकशी केली जात आहे.
वैद्यकीय सेवेतून मानवतेचा विश्वासघात?
अल्पवयीन मुलीच्या गर्भधारणेची माहिती संबंधित यंत्रणांना न देता बेकायदेशीररीत्या प्रसूती केल्याच्या आरोपामुळे वैद्यकीय क्षेत्रावर प्रश्नचिन्ह निर्माण झाले आहे. नवजात बालकाच्या भवितव्याशी खेळणाऱ्या या कथित रॅकेटमागे आणखी कोणाचा सहभाग आहे का, याचा तपास आता पोलिसांसमोर मोठे आव्हान ठरणार आहे.
क्राईम न्यूज विशेष : अल्पवयीनेच्या आयुष्याशी खेळ, नवजात बालकाच्या भवितव्यावर सौदा आणि कायद्याला हरताळ फासण्याचा कथित प्रयत्न — मालेगावातील हे प्रकरण केवळ गुन्हेगारीचे नाही तर समाजमन हादरवणारे वास्तव ठरत आहे.
