सकाळी रिक्षा चालवायचे आणि रात्र होताच सुरु व्हायचा धक्कादायक प्रकार; कल्याणमध्ये उघडकीस आली भयंकर घटना

कल्याण: स्टेशनकडे चालत जाणाऱ्या प्रवाशांना लुटण्याच्या तयारीत असलेल्या सात जणांच्या टोळीला डोंबिवली रामनगर पोलिसांनी बेड्या ठोकल्या आहेत. या सात जणांच्या टोळीत तीन रिक्षाचालकांसह दोन अल्पवयीन मुलांचा समावेश आहे. सागर उर्फ मुन्ना शर्मा, जेम्स सुसे, सत्यकुमार कनोजिया, सचिन ऊर्फ पिल्लू राजभर, सोनू कनोजिया अशी अटक करण्यात आलेल्या आरोपींची नावे आहेत. यामधील मुन्ना व सत्यकुमार हे रिक्षाचालक असून तेच मुख्य सूत्रधार होते. दिवसभर रिक्षा चालविण्याच्या नावाखाली ते रेकी करत प्लॅनिंग करत असत. रात्री सर्वजण एकत्र येत निर्जन स्थळी पादचाऱ्याला गाठून त्याला मारहाण करत लुटले जात असे. या टोळीविरोधात डोंबिवली रामनगर, टिळकनगर, मानपाडा, हिललाइन पोलिस ठाण्यात गुन्हे दाखल असल्याची माहिती पोलिसांनी दिली

गेल्या काही महिन्यांपासून डोंबिवली परिसरात चोरीच्या घटनांमध्ये वाढ झाली आहे. पोलिसांनी विशेष पथके तयार करत या चोरांचा शोध सुरू केला. या दरम्यान काही आरोपी दरोडा टाकण्याच्या तयारीत ठाकुर्ली येथील म्हसोबा चौक येथे येणार असल्याची माहिती डोंबिवली रामनगर पोलिसांच्या पथकाला मिळाली होती. या माहितीनुसार वरिष्ठ पोलिस निरीक्षक सचिन सांडभोर यांच्या मार्गदर्शनाखाली सहाय्यक पोलिस निरीक्षक योगेश सानप, बळवंत भराडे, पोलिस हवालदार विशाल वाघ, प्रशांत सरनाईक, सुनील भणगे यांनी म्हसोबा चौक येथे सापळा रचला. रात्रीच्या सुमारास सातजण या ठिकाणी संशयास्पदरित्या फिरताना या पथकाला आढळले. पोलिसांनी तत्काळ या सर्वांना ताब्यात घेऊन चौकशी केली असता त्यांच्या झडतीत पोलिसांना धारदार कोयता, चाकू, कटावणी, स्क्रू डायव्हर अशा घातक शस्त्रांसह मिरचीची पूड आणि एक नायलॉन दोरी आढळून आली.

या सर्वांना अटक करून तपासणीदरम्यान ते दिवसा रिक्षाचालक म्हणून वावरत रात्री मित्रांच्या मदतीने दरोडा टाकत असल्याचे स्पष्ट झाले. मागील पाच वर्षांपासून म्हणजेच २०१८ पासून ही टोळी याच परिसरात सक्रिय असून एकट्या दुकट्या प्रवाशावर धारदार हत्याराने वार करत त्यांना लुटत होते. हे सर्व जण त्याच परिसरात राहणारे असले तरी मूळचे उत्तरप्रदेश, मध्यप्रदेश आणि हरयाणाचे रहिवासी आहेत. तपासादरम्यान अटक आरोपींकडून एक रिक्षा, दोन बाइक, दोन महागडे मोबाइल जप्त करण्यात आल्याची माहिती एसीपी सुनील कुराडे यांनी दिली