पोलीस ठाण्यातच पोलिसाची स्वतःवर गोळी झाडून आत्महत्या; सुसाइड नोटही सापडली

लातुरः पोलीस कर्मचाऱ्याची स्वतःवर गोळी झाडून आत्महत्या केल्याची घटना जिल्ह्यात घडली आहे. पोलिस ठाण्यातच या कर्मचाऱ्याने आत्महत्या केल्याची घटना समोर येत आहे. या घटनेमुळं परिसरात एकच खळबळ उडाली आहे. पोलिस खात्यातील एका पोलिस कर्मचाऱ्याने स्वतःचं गोळी झाडून आत्महत्या केल्याची घटना लातूर जिल्ह्यातील किल्लारी येथे घडली आहे. साहेबराव सावंत (वय ३८) असे या पोलीस कर्मचाऱ्याचे नाव आहे. लातूर जिल्ह्यतील किल्लारी पोलीस पोलीस ठाण्यात साहेबराव सावंत अंमलदार म्हणून कार्यरत होते. रविवारी मध्यरात्री २च्या सुमारास त्यांनी किल्लारी पोलिस ठाण्यात सीसीटीएनएस रूममध्ये एसएलआर रायफल बट नंबर २४८ मधून स्वतःवर गोळी झाडून आत्महत्या केली. आत्महत्येपूर्वी त्यांनी एक चिठ्ठी लिहून ठेवल्याचे सूत्रांकडून समजते. मात्र आत्महत्येचं कारण अद्याप स्पष्ट झालं नाहीया प्रकरणी किल्लारी पोलीस ठाण्याचे पोलीस नाईक श्रीकृष्ण ज्ञानदेव गायकवाड यांनी दिलेल्या माहितीवरून किल्लारी पोलीस ठाण्यात अकस्मात मृत्यूची नोंद करण्यात आली आहे. वरीष्ठ पोलीस अधिकारी या घटनेची अधिक माहिती घेत आहेत. साहेबराव सावंत यांना तीन मुली, पत्नी, आई-वडील असा परिवार असल्याचे समजते आहे. घटना कळल्यानंतर सावंत यांच्या नातेवाईकांनी किल्लारी ठाण्यात गर्दी केली होती.