ठाणे: आसनगावमध्ये एका बापाने आपल्या अकरा वर्षीय मुलीसह आत्महत्या (Suicide) केल्याने परिसरात एकच खळबळ उडाली. मंगळवारी १६ तारखेला राहत्या घरी या बापाने आपल्या मुलीसह गळफास घेऊन आत्महत्या केली आहे. आत्महत्येपूर्वी या बापाने एक सुसाईड नोट लिहिली आहे. या लिहलेल्या पत्रात पोलिस, समाज व्यवस्था यावर गंभीर भाष्य केले आहेत. या घटनेमुळे आसनगांव परिसरासह पूर्ण शहापुर तालुक्यातुन हळहळ व्यक्त केली जात आहे.
कसाऱ्याजवळील आसनगाव येथील विकास केदारे या ३४ वर्षीय व्यक्तीने आपल्या ११ वर्षीय आर्या केदारे हिच्या सोबत राहत्या घरी गळफास घेऊन आत्महत्या केल्याची घटना मंगळवारी १६ तारखेला घडली. या घटनेमुळे शहापूर तालुक्यात हळहळ व्यक्त केली जात आहे. काही महिन्यांपूर्वी विकास यांची पत्नी मोनाली हिने विष प्राशन करून आत्महत्या केली होती. मोनाली हिच्या आत्महत्येला विकास कारणीभूत असल्याचा आरोप करण्यात आला होता. या आरोपाखाली विकास आणि त्याची वयोवृद्ध आईला काही महिने न्यायालयीन कोठडी (जेल कस्टडी) सुनावण्यात आली होती. त्यानंतर जानेवारी महिन्यात विकास हा तुरुंगातून बाहेर आला होता. मात्र आपल्यासोबत घडलेली ही संपूर्ण घटना सहन करण्याच्या पलीकडची असल्याचे विकासने सुसाईड नोट मध्ये नमूद केले होते. त्याच नैराश्यातून आपण मुलीसह स्वतःला संपवण्याचा निर्णय घेतला असल्याचे त्याने सुसाईड नोट मध्ये लिहिले आहे.
या लिहलेल्या दोन पाणी सुसाईड नोटमध्ये अनेक मुद्दे हे अत्यंत भावनिक असून यात अनेक गोष्टींचा उल्लेख करण्यात आला आहे. दरम्यान, शहापूर पोलिसांनी विकास आणि आर्याच्या आत्महत्येनंतर दोघांचे मृतदेह शवविच्छेदनासाठी शहापूर येथील उपजिल्हा रुग्णालयात पाठवले असून सुसाईड नोट ताब्यात घेत त्या सुसाईड नोटच्या आधारे पुढील तपास सुरु केला आहे.
विकासने सात महिने भोगल्या यातना
या सुसाईड नोटमध्ये विकासने जवळपास ७ महिने भोगलेल्या यातना मांडल्या आहेत. त्यात त्याने ‘मोनाली गेली. ती गेली पण मागे खूप सारे प्रश्न सोडून गेली. ७ महिन्यामध्ये मी रोज माझं मरण पाहिलं आहे. खूप त्रास होत आहे. त्यात झालेला त्रास कदाचित कुणीच समजू शकणार नाहीत. कुणाच्या तरी सांगण्यावरून तक्रार झाली. त्यानंतर मी कसं आयुष्य भोगले ते फक्त मीच सांगू शकतो. आर्याकडे पाहून पुन्हा उभं रहायचा खूप प्रयत्न केला, पण आता खूप असह्य होत आहे. मी आणि आर्या आम्ही दोघेही आत्महत्या करीत आहोत.’ अशी सुरुवात सुसाईड नोटमध्ये केली आहे. सुसाईड नोटच्या शेवटी माझी कुणा विरोधात कुठलीही तक्रार नसल्याचा उल्लेख देखील करण्यात आला आहे. दरम्यान, या सुसाईड नोटच्या आधारे शहापूर उपविभागीय पोलीस अधिकारी नवनाथ ढवळे यांच्या मार्गदर्शनाखाली शहापूर पोलीस पुढील तपास करीत आहेत.
/maharashtra/thane/asangaon-father-suicide-with-daughter/videoshow/90298088.cms?utm_source=slikevideo&utm_medium=referral
