अजान सुरू असतानाच भोंग्यावर वाजलं गाणं; पोलीस अधिकाऱ्यावर गुन्हा

औरंगाबाद: राज्यात सध्या भोंग्यावरून वातावरण तापले असताना औरंगाबादमध्ये एका रेल्वे पोलिसाला भोंग्यावरून गाणे वाजवणे चांगलेच महागात पडले आहे. अजान सुरू असताना एका पोलीस उपनिरीक्षकाने भोंग्यावर मोठ्या आवाजात गाणे लावले म्हणून गुन्हा दाखल करण्यात आला आहे. माहितीनुसार सातारा पोलीस ठाण्यात हा गुन्हा दाखल करण्यात आला आहे. किशोर गडप्पा मलकूनाईक असं गुन्हा दाखल झालेल्या पोलीस अधिकाऱ्याचं नाव आहे.

मिळालेल्या प्राथामिक माहितीनुसार, संबधित पोलीस अधिकाऱ्याच्या घराच्या मागे असलेल्या मस्जिदीत नमाज पठण सुरू होते. त्यावेळी या अधिकाऱ्याने मस्जिदीच्या दिशेने मोठ्या आवाजात लाऊडस्पीकरवर गाणे लावले. एका जबाबदार अधिकाऱ्याने केलेली ही कृती भयंकर होती. यातून 2 धर्मात तेढ निर्माण होऊ शकते. त्यामुळे संबधित पोलीस अधिकाऱ्यावर गुन्हा दाखल करण्यात आल्याची माहिती सातारा पोलिसांनी दिली आहे.

संबधित पोलीस अधिकारी हे रेल्वे सुरक्षा दलात पोलीस उपनिरीक्षक या पदावर कार्यरत आहे. एका जबाबदार पदावर असून सुद्धा त्यांनी पोलीस आयुक्त निखिल गुप्ता यांचा आदेश क्र.जा क्र विशा-४/आदेश/औ बाद/ २०२२-१५७५ औरंगाबाद दि. २२/०४/२०२२ अन्वये प्राप्त आदेश महाराष्ट्र पोलीस अधिनियम १९५१ चे कलम ३७(१) व (३) चे उल्लंघन केले. त्यानुसार गुन्हा दाखल करण्यात आल्याची माहिती सातारा पोलिसांनी दिली.