ठाण्यातील राबोड़ी परिसरात राहणारे काशीनाथ पाटील हे रेती व्यवसायिक आहेत. पत्नी, दोन मुले, दोन सुना व नातवंडे अशा आपल्या परिवारासह ते राहतात. दरम्यान, काशीनाथ पाटील आणि त्यांची मोठी सून सीमा यांच्यात गुरुवारी सकाळी 11.30 वाजण्याच्या सुमारास वेळेत नाश्ता दिला नाही या कारणावरून घरगुती किरकोळ वाद झाला.
वेळेत नाश्ता देतो तरी देखील तुम्ही बाहेर जाऊन सुनांची बदनामी करता, असे सीमाने सासऱ्यास उलट उत्तर दिले. याचा राग आल्याने काशीनाथ पाटील याने आपल्या पिस्तूलातून सुनेवर गोळीबार केला. या घटनेत सीमा गंभीर जखमी झाल्या. त्यांना ठाण्यातील ज्युपिटर हॉस्पिटलमध्ये दाखल करण्यात आले.
मात्र, उपचारादरम्यान आज (शुक्रवार) पहाटे तिचा मृत्यू झाला. ज्या पिस्तुलातून गोळी झाडण्यात आली तिचा रितसर परवाना आहे अशी माहिती पोलिसांनी दिली. या प्रकरणी राबोडी पोलिसांनी खुनाचा गुन्हा दाखल केला आहे. काशीनाथ सध्या फरार असून राबोड़ी पोलिस त्यांचा शोध घेत आहेत.
