चोरीची हद्द; या चोरांनी जे चोरलंय ते पाहून तुम्हीही डोक्याला हात माराल

धुळे जिल्ह्यात चोरीच्या घटनांमध्ये दिवसेंदिवस मोठ्या प्रमाणात वाढ होत आहे. चोरटे रोज नवनवीन अनोखी शक्कल लढवून चोरी करण्याचा मार्ग शोधून काढत आहेत. चोरट्यांच्या रोज नवीन शोधून काढलेल्या अनोखी शक्कलमुळे पोलिसही चांगलेच चक्रावले आहेत. चोरटे आता काय काय चोरतील याचाही नेमच नाही. अशीच एक अनोखी चोरी धुळे जिल्ह्यातील शिरपूर तालुक्यात घडली आहे. इथल्या चोरांनी रेतीच्या डंपरचे आठही चाक चोरून नेल्याची धक्कादायक घटना समोर आली आहे.

धुळे जिल्ह्यासह शिरपूरात चोरांनी आता तर चक्क चोरीची हद्दच पार केली असून चक्क उभे असलेल्या मालवाहू डंपरचे आठ टायर चोरी केल्याची घटना रात्रीच्या सुमारास घडली आहे. याबाबत शिरपूर शहर पोलीस स्टेशनात गुन्हा दाखल करण्यात आला आहे. घटनास्थळी जाऊन पोलिसांकडून कसून चौकशी करण्यात येत आहे.

मिळालेल्या प्राथमिक माहितीनुसार, शिरपूर शहरालगत शिरपूर फाटा जवळील मुंबई आग्रा महामार्गावरील गावकरी हॉटेल येथे अंबालाल राजपूत रा. आमोदे यांनी आपले डंपर उभे केले होते. मात्र, रात्रीच्या सुमारास अज्ञात चोरट्यांनी चक्क उभ्या डंप्परचे टायर खोलून चोरून नेल्याचे उघड झाले आहे. घटनेवरील हॉटेलचे सीसीटीव्ही कॅमेराची देखील चोरट्यांकडून मोडतोड करण्यात आली आहे. तर याच परिसरात ट्रॅक्टरच्या शोरूममधून डिझेल तर एका हॉटेल मध्येही चोरी झाली आहे. चक्क उभ्या डंप्परचे टायर चोरी झाल्याने सर्वत्र एकच खळबळ उडाली आहे.