लव्ह जिहादवरून अमरावतीचं वातावरण तापलं, दहशतवादी कसाबचे वकीलपत्र स्वीकारणारे वकील अडचणीत

अमरावती : आंतरधर्मीय विवाहाची परवानगी नसतानाही येथील विजय कॉलनी स्थित चंद्रविला धर्मदाय संस्थेकडून विशिष्ट समुदायातील दोघांचा विवाह लावून बनावट प्रमाणपत्र देण्यात आले होते. राज्यसभा खासदार डॉ. अनिल बोंडे यांनी हा प्रकार लव्ह जिहादचा असल्याचा आरोप केला होता. अखेर या प्रकरणात चंद्रविला संस्थेविरुद्ध येथील फ्रेजरपुरा पोलीस ठाण्यात फसवणुकीचा गुन्हा दाखल करण्यात आला आहे. विशेष म्हणजे दहशतवादी अजमल कसाबचे वकीलपत्र स्वीकारणारे महेश देशमुख याच संस्थेचे आहेत. त्यामुळे देशद्रोही व्यक्तींच्या मुसक्या बांधल्या पाहिजे, त्यांना शिक्षा व्हायला पाहिजे, अशी मागणी खासादर डॉ. अनिल बोंडे यांनी केली आहे.

जिल्ह्यातील धारणी येथील उच्चशिक्षित तरुणीला रुग्णवाहिका चालक असणाऱ्या एका विशिष्ट धर्माच्या युवकाने प्रेम जाळ्यात अडकवून अमरावती येथे आणले होते. विजय कॉलनी स्थित महेश देशमुख यांच्या चंद्रविला चारिटेबल ट्रस्टकडून दोघांचे लग्न लावले होते. संबंधित संस्थेला आंतरधर्मीय विवाह लावण्याची परवानगी नाही. तरीही महेश देशमुख यांच्या संस्थेकडून बनावट मॅरेज सर्टिफिकेट देण्यात आले होते.

राज्यसभेचे खासदार डॉ. अनिल बोंडे यांनी हे धक्कादायक प्रकरण उघडकीस आणले. आणि सदर प्रकरण हे लव्ह जिहादचे असल्याचा आरोप केला होता. त्यानंतर पोलीस आयुक्त डॉ. आरती सिंह यांच्याशी डॉ. बोंडे यांनी फोनवरून संपर्क साधून संबंधित प्रकार अतिशय गंभीर असल्याने कारवाईची मागणी केली होती. याची दखल घेत पोलीस आयुक्त आरती सिंह यांनी विजय कॉलनी स्थित चंद्रविला संस्थेविरुद्ध फ्रेजरपुरा पोलीस ठाण्यात फसवणुकीचे गुन्हे दाखल केले आहेत.