ठाण्यातील वागळे इस्टेट येथील किसननगर नंबर २ येथे राहत असलेली जिजाबाई बाळू केदार ही ६५ वर्षीय वयोवृद्ध महिला ५ सप्टेंबर पासून बेपत्ता असल्याची तक्रार ठाण्यातील श्रीनगर पोलीस ठाण्यात ७ सप्टेंबर रोजी करण्यात आली होती. या वयोवृद्ध महिलेचा तपास करण्यासाठी श्रीनगर पोलीस यांनी जिजाबाई केदार यांच्या घरी जाऊन पाहणी केली. घराला बाहेरून कुलूप होते तसेच घरातून दुर्गंधी येत असल्यामुळे पोलिसांनी घराचे कुलूप तोडले. घरात प्रवेश करताच पोलिसांना जिजाबाई यांचा मृतदेह कुजलेल्या अवस्थेत रक्ताच्या थारोळ्यात पडलेला आढळून आला. पोलिसांना कुठलाही पुरावा न मिळाल्याने धारदार शास्त्राने हत्या केल्या प्रकरणी पोलिसांनी अज्ञात व्यक्तीच्या विरोधात गुन्हा दाखल केला.
बेपत्ता असलेल्या वयोवृद्ध महिला मृत अवस्थेत घरात रक्ताच्या थारोळ्यात आढळून आल्याने परिसरात एकच खळबळ उडाली. पोलिसांनी जागेचा पंचनामा करत कुठलाही पुरावा नसताना तपासाला सुरुवात केली. श्रीनगर पोलीस ठाण्याचे पोलीस पथकाने गुन्हयामध्ये आरोपी विरुध्द कोणताही सुगावा नसताना मोठया कौशल्याने व चिकाटीने तपास करून मयत वयोवृद्ध महिलेच्या शेजारी राहणारे २७ वर्षीय नारायण विजयलाल केवट याला ताब्यात घेतले. यावेळी पोलिसांनी पोलिसी खाक्या दाखवत तपास केला असता शेजारी नारायण केवट याने आपण हे कृत्य केल्याची कबुली दिली. तसेच जिजाबाई यांच्या अंगावरील दागिने घेऊन त्याने आपली आई ४७ वर्षीय सुभावती विजयलाल केवट हिला दिल्याची माहिती पोलिसांना कबुली दिली. या मिळालेल्या सुगाव्या नंतर पोलिसांनी जिजाबाई यांचे शेजारी नारायण केवट व त्याची आई सुभावती केवट यांना अटक केली आहे
.जिजाबाई या भिशी चालवत असत आणि भिशीतून आलेले पैसे ते व्याजाने देत असत. मात्र, जिजाबाई घरात एकटी असल्याचे पाहून त्यांचा शेजारी नारायण केवट हा रात्री पैसे चोरीच्या उद्देशाने घरात घुसला. घरात कोणीतरी घुसले याची चाहूल लागताच जिजाबाई यांना जाग आली. जिजाबाई यांनी विरोध करण्याचा प्रयत्न केला असता नारायण याने जिजाबाई यांच्या गळ्यावर धारदार शास्त्राने वार करून त्यांची हत्या केली. हत्या केल्यानंतर नारायण ने जिजाबाई यांच्या घराची झडती घेतली. मात्र, पैसे न मिळाल्याने नारायणने जिजाबाई यांच्या अंगावरील दागिने काढून घराला बाहेरून कुलूप लावून पसार झाला. त्यानंतर नारायणने आपल्या आईला घडलेला प्रकार सांगितला आणि जिजाबाई यांचे सगळे दागिने आई सुभावती हिच्या ताब्यात दिले.
प्रकरणात गुन्हेगार शेजारी नारायण आणि सहभाग आढळल्याने त्याची आई सुधावती हिला पोलिसांनी अटक करून अवघ्या १२ तासात खुनाचा गुन्हा उघड करून माय-लेकाला अटक केली. पोलिसांच्या या उत्कृष्ट कामगिरी बद्दल परिमंडळ ५ चे पोलीस उप आयुक्त डॉ. विनयकुमार राठोड यांनी उत्कृष्ट तपास आणि कामगिरीबाबत पो. ना. सुनिल धोंडे, मुकुंद राठोड, निलेश शेंडगे यांना १५ हजाराच्या बक्षीसाने सन्मानित केले आहे
