पत्नीने पतीला प्रेयसीसोबत रंगेहाथ पकडले अन् तिथेच दोघांना चोपले, जळगावात राडा

जळगाव : कॉलेजच्या कामाच्या नावाने घरातून बाहेर पडलेल्या पतीला पत्नीनेच प्रेयसीसोबत रंगेहाथ पकडल्याची घटना रविवारी सकाळी घडली. एका हॉटेलात पती प्रेयसी सोबत बसलेला पाहून पत्नीचा संताप अनावर झाला. पत्नीने दोघांना जागेवरच चोप दिला. त्यानंतर दोघांना पोलीस ठाण्यात हजरही केले. या घटनेची जळगावात एकच चर्चा सुरू आहे. जळगाव शहरातील एका भागात रहिवासी तरुण शिरसोली रस्त्यावरील एका महाविद्यालयात नोकरीला आहे. रविवारी सुट्टी असतानाही तो त्याच्या पत्नीला महाविद्यालयात जायचे असल्याचे सांगून घराबाहेर पडला, अशी माहिती सूत्रांनी दिली.

पतीला प्रेयसीसोबत पाहिले आणि पत्नीने...

महाविद्यालयात न जाता पती महाविद्यालय परिसरातील रेस्टॉरंटमध्ये प्रेयसीसोबत असल्याची माहिती पत्नीला मिळाली. यानंतर पत्नीने तिच्या भावाला सोबत घेत थेट रेस्टॉरंट गाठले. तिथे पती प्रेयसीसोबत नाश्ता करत होता. हे पाहून संतापलेल्या पत्नीने पतीसह त्याच्या प्रेयसीच्या कानशिलात लगावली. या घटनेने भर रस्त्यावर मोठी गर्दी झाली होती. या प्रकाराची माहिती मिळाल्यानंतर पोलिसांचे निर्भया पथक घटनास्थळी दाखल झाले. या पथकाने सर्वांना एमआयडीसी पोलीस ठाण्यात नेले. तिथे गेल्यावर पतीच्या प्रेमप्रकरणाचा भांडाफोड तिने केला.

पोलीस ठाण्यात पती-पत्नी आणि ती असे तिघांचे म्हणणे ऐकून घेत प्रेयसीच्या आई-वडिलांनाही पोलीस ठाण्यात पाचारण करण्यात आले. प्रेयसीला तिच्या आई वडिलांच्या, तर प्रियकराला मेहुण्याच्या ताब्यात देण्यात आले. या घटने संदर्भात पत्नीने पती व प्रेयसीविरुद्ध तक्रार दिली असून त्यानुसार अदखलपात्र गुन्ह्याची नोंद करण्यात आलेली आहे.

हाताच्या नसा कापून घेईल किंवा रस्त्यावर वाहनांच्या समोर उभा राहून जीव देईल

तू माझ्यावर संशय घेऊ नको, नाही तर मी माझ्या हाताच्या नसा कापून घेईल किंवा रस्त्यावर वाहनांच्या समोर उभा राहून जीव देईल, अशी धमकी पतीने यावेळी दिल्याचे तक्रारीत नमूद आहे. या गुन्ह्याचा तपास समाधान टहाकळे करीत आहेत.