अमरावतीच्या हॉस्पिटलमधून बच्चू कडू नागपूरला शिफ्ट, प्रकृती खालावली, तब्येतीच्या अपडेट्सबाबत गोपनीयतेच्या चर्चा

आमदार बच्चू कडू यांच्या डोक्याला आणि उजव्या पायाला मोठ्या प्रमाणात इजा झाल्याची माहिती आहे. त्यांच्या डोक्याला चार टाके पडले असल्याची माहिती डॉक्टरांकडून देण्यात आली आहे. आज अमरावती शहरात सकाळी सहा ते साडेसहाच्या दरम्यान रस्ता ओलांडताना एका दुचाकीस्वाराने त्यांना धडक दिली. या दुचाकीच्या धडकेत बच्चू कडू रोडच्या दुभाजकावर जोरदार आदळल्याने डोक्याला मोठ्या प्रमाणात मार लागल्याची माहिती आहे.

अमरावती : शिंदे गटाचे आमदार माजी मंत्री बच्चू कडू यांचा आज पहाटे रस्ता ओलांडताना अपघात झाला. या अपघातात बच्चू कडू यांच्या डोक्याला आणि पायाला मार लागला आहे. त्यांच्या डोक्याला पाच टाकेही पडले आहेत. बच्चू कडू यांच्यावर अमरावतीतील एका खासगी रुग्णालयात उपचार करण्यात आले. मात्र, सद्या त्यांना नागपूरच्या रुग्णालयात नेण्यात आलं असून सकाळी प्रकृती उत्तम आहे, असं सांगणाऱ्या बच्चू कडूंची प्रकृती दुपारी कशी खालावली, अशी कुजबूज त्यांच्या कार्यकर्त्यांमध्ये आहे. महत्त्वाचं म्हणजे नागपूरला शिफ्ट करताना त्यांच्या प्रकृतीच्या अपडेट्सबाबत प्रचंड गोपनीयता पाळण्यात आल्याचीही चर्चा आहे.

शिंदे गटाचे आमदार बच्चू कडू आज पहाटे रस्ता ओलांडत असताना त्यांना एका दुचाकीने जबर धडक दिली. यामध्ये ते जखमी झाले असून त्यांच्या डोक्याला पाच टाके लागल्याचे समजते. दरम्यान त्यांनी या अपघाताची माहिती स्वतः ट्विट करून दिली. माझा अपघात झाला असून डोक्याला मार आहे. परंतु सध्या माझी प्रकृती चांगली आहे. कार्यकर्त्यांनी काळजी करण्याचे कारण नाही, अशी माहिती त्यांनी ट्विटरद्वारे दिली.

दुपारी अडीच-तीन वाजताच्या सुमारास बच्चू कडू यांची प्रकृती खालावल्याचे कारण देत डॉक्टरांनी त्यांना नागपूर येथे नेण्याचा सल्ला दिल्याची माहिती समोर येत आहे. डॉक्टरांच्या सल्ल्यानंतर बच्चू कडू यांना तात्काळ नागपूर येथील एका खाजगी रुग्णालयात हलवण्यात आले आहे. या संदर्भात माध्यमांशी बोलताना भाजपचे नेते चंद्रकांत बावनकुळे म्हणाले की, मी बच्चू कडू यांची भेट घेण्यासाठी जाणार होतो. मात्र ते नागपूरला गेल्याचे समजते. आम्ही नागपूरला पोहोचल्यानंतर त्यांची भेट घेणार आहोत.

दुसरीकडे बच्चू कडूंच्या अपघातावर राष्ट्रवादीचे आमदार अमोल मिटकरी यांनी संशय व्यक्त केलाय. यासाठी गेल्या काही काळात बच्चू कडूंनी सातत्याने घेतलेल्या भूमिकेचे संदर्भ आमदार मिटकरींनी यांनी दिलेत. सध्याच्या सरकारविरूद्ध बच्चू कडूंनी सातत्याने घेतलेली बंडाची, विद्रोहाची भूमिका तर या अपघातामागे नाही ना? असा प्रश्न आमदार अमोल मिटकरींनी व्यक्त केलाय.

दरम्यान, आज अमरावतीच्या पदवीधर मतदार संघाच्या निवडणुकीसाठी उपमुख्यमंत्री देवेंद्र फडणवीस, भाजप प्रदेशाध्यक्ष चंद्रकांत बावनकुळे यांच्यासह अनेक दिग्गज नेते अमरावतीत होते. ते बच्चू कडू यांची भेट घेणार असल्याच्या चर्चा होत्या. परंतु त्याआधीच बच्चू कडू यांना नागपूरला शिफ्ट करण्याल आलेलं आहे.