पत्ता विचारण्याच्या बहाण्याने सौदामिनी सिग्नलनजीक एक विकृत कारचालकाने तरुणीसोबत अश्लील चाळे केले. तरुणीला संशय आल्यावर तिने मोबाइलमधून चित्रीकरण सुरू केले. त्यानंतर घडलं असं...
मुंबई : रेसकोर्सजवळील सरकारी अधिकारी वसाहतीमध्ये राहणाऱ्या एका उच्चपदस्थ अधिकाऱ्याच्या मुलीचा पाठलाग करून अश्लील चाळे करणाऱ्या विकृताला ताडदेव पोलिसांनी अटक केली. सोमवारी रात्री ही घटना घडली. पत्ता विचारण्याच्या बहाण्याने या तरुणाने जवळीक साधली आणि त्यानंतर अश्लील चाळे करू लागला. मुलीने संशयास्पद वाटतच त्याचे कृत्य मोबाइलमध्ये कैद केले. त्यावरून पोलिसांनी त्याला शोधून काढले.
मंत्रालयात उच्चपदस्थ अधिकारी सहा महिन्यांपासून लाला कॉलेजनजीक असलेल्या सरकारी वसाहतीमध्ये वास्तव्यास आहे. या अधिकाऱ्याची २५ वर्षीय मुलगी सोमवारी रात्री साडेआठच्या सुमारास व्यायामशाळेतून घरी परतत होती. येथील सौदामिनी सिग्नलनजीक एक कार तिच्याजवळ येऊन थांबली. कारमध्ये बसलेल्या तरुणाने लोअर परळला जाण्याचा रस्ता विचारला. मुलगी रस्ता सांगत असताना कारमधील तरुणाने अश्लील चाळे सुरू केले. तिने आपल्या मोबाइलमधून चित्रीकरण सुरू केले. तरीही त्याचा अश्लीलपणा सुरूच असल्याने ती जोरात ओरडली. पकडले जाऊ, या भीतीने कारचालकाने तेथून पळ काढला. या घटनेबाबत वडिलांना माहिती दिल्यानंतर मुलीने ताडदेव पोलिस ठाण्यात तक्रार केली. ताडदेव पोलिसांनी गुन्हा दाखल करून तिच्या मोबाइलमधील चित्रीकरणाच्या आधारे विकृत चाळे करणाऱ्या तरुणाला शोधून काढले
