आईचा खून करून मुलगी त्याच घरात मृतदेहासोबत राहत असल्याची घटना उघडकीस आली. पोलिसांनी मुलीला अटक केली आहे. तीन महिन्यांपूर्वी तिनं आईची हत्या केली आणि तिचे तुकडे घरातच विविध ठिकाणी ठेवले होते.
मुंबई: आईची हत्या करून तिच्या मृतदेहाचे तुकडे कपाटात ठेऊन ३ महिने त्याच घरात राहणाऱ्या मुलीला पोलिसांनी अटक केली. रिम्पल जैन (२४) असं आरोपी तरुणीचं नाव आहे. रिम्पलनं तिची आई वीणाची (५५) ३ महिन्यांपूर्वी हत्या केली. रिम्पलनं आईच्या मृतदेहाचे तुकडे केले. ते तुकडे तिनं फ्लॅटमध्ये विविध ठिकाणी लपवले.
मृतदेहाची दुर्गंधी बाहेर पसरू नये यासाठी रिम्पलनं २०० परफ्युम बाटल्या आणि एअर फ्रेशनर्सचा वापर केला. रिम्पलनं शेजारच्यांसोबतचे सर्व संबंध तोडले. ती एकटीच तिच्या घराच्या खिडकीत बसायची आणि तिथून दिसणारी लालबाग चौकातील वाहतूक पाहायची. गेले कित्येक आठवडे रिम्पलचा हाच दिनक्रम होता. शेजारच्यांनी आईबद्दल विचारणा केल्यावर रिम्पल त्यांना खोटी माहिती द्यायची. आई कानपूरला गेल्याचं सांगायची.
रिम्पल ही वीणा यांची एकुलती एक लेक होती. गेल्या १६ वर्षांपासून दोघी लालबाग नाक्यावरील इब्राहिम कासीम चाळीत राहत होत्या. रिम्पलच्या वडिलांचं काही वर्षांपूर्वी आजारानं निधन झालं. त्यानंतर रिम्पल आणि वीणा यांची देखभाल रिम्पलचा मामा करत होता. मंगळवारी रिम्पलची मामेबहीण पैसे देण्यासाठी घरी गेली. रिम्पलनं दार पूर्ण उघडलं नाही. तिनं फटीतून पैसे घेतले. त्यावेळी मामेबहिणीनं वीणा यांच्याबद्दल विचारलं. तेव्हा रिम्पलनं आई कानपूरला गेल्याचं सांगितलं.
मामेबहिणीला काहीसा संशय आला. तिनं तिच्या आईला आणि नातेवाईकांना बोलावलं. मात्र रिम्पलनं दार उघडण्यास नकार दिला. काही वेळानं तिनं दार उघडलं. आतमध्ये कोणीच नव्हतं. मात्र घरात एक उग्र दर्प येत होता. आई कानपूरला गेल्याचं यावेळी रिम्पल सगळ्यांना सातत्यानं सांगत होती. यानंतर कुटुंबीयांनी काळाचौकी पोलीस ठाण्यात धाव घेतली.
पोलीस रिम्पल राहत असलेल्या फ्लॅटवर पोहोचले. त्यावेळी त्यांनी सगळीकडे सामान अस्ताव्यस्त पसरलेलं दिसलं. पोलिसांनी लोखंडी कपाट उघडलं. त्यातून तीव्र दुर्गंधी आली. कपाटाच्या तळाला एक प्लास्टिकची पिशवी होती. त्यात वीणा यांचं शीर होतं. यानंतर पोलिसांनी अन्य अवयव शोधण्यासाठी घराची झडती घेतली. तेव्हा त्यांना स्टिलच्या टाकीत हात पाय सापडले. यानंतर पोलिसांनी रिम्पलला ताब्यात घेतलं.
