जळगाव शहरात गुढीपाडव्याच्या दिवशी मन सुन्न करणारी घटना घडली. या घटनेमुळे दोन मुलं पोरकी झाली आहेत. रिक्षाचालकाने टोकाचं पाऊल उचलल्याने ऐन सणाच्या दिवशी कुटुंबावर शोककळा पसरली.
जळगाव : पत्नी मुलीला सोबत घेवून कामाला गेली होती. तर मुलगा बाहेर खेळत होता. यादरम्यान घरात एकट्या असलेल्या रिक्षाचालकाने गळफास घेवून जीवन संपवलं. गुढीपाडव्याच्या दिवशी बुधवारी दुपारी २ वाजेच्या सुमारास ही घटना समोर आली. दत्तु नामदेव चौधरी (वय ३८) असे मृत रिक्षाचालकाचे नाव आहे. ऐन सणाच्या दिवशीच्या ही घटना घडल्याने कुटुंबीय तसेच परिसरातील नागरिकही सुन्न झाले. रिक्षाचलकाच्या आत्महत्येचे कारण समजू शलेले नाही. याप्रकरणी शनिपेठ पोलिसात अकस्मात मृत्यूची नोंद करण्यात आली आहे.
कांचन नगर येथे दत्तू चौधरी हे पत्नी, मुलगी व मुलासह वास्तव्यास होते. रिक्षा चालवून ते कुटुंबाचा उदरनिर्वाह करायचे. बुधवारी गुढीपाडव्याचा सण होता. पत्नी मुलीला घेवून सकाळीच केटरिंगच्या कामाला निघून गेली होती. तर दत्तू चौधरी हे मुलासह घरी होते. काही वेळानंतर मुलगाही घराबाहेर गल्लीत इतर मुलांसोबत खेळण्यासाठी निघून गेला. यादरम्यान घरात एकट्या असलेल्या दत्तू चौधरी यांनी घराचा दरवाजा बंद केला. गॅस सिलिंडरवर उभं राहून घरात गळफास घेवून आपली जीवनयात्रा संपवली
काही वेळाने दुपारी दीड वाजेच्या सुमारास खेळून झाल्यानंतर दत्तू चौधरी यांचा मुलगा घरी परत आला. त्याला वडील गळफास घेतलेल्या अवस्थेत दिसून आले. ते पाहून तो हादरला. या घटनेची माहिती कळाल्यानंतर शनिपेठ पोलीस ठाण्याचे पोलीस उपनिरीक्षक मुबारक तडवी, अभिजीत सैंदाणे व किरण वानखेडे यांनी घटनास्थळी धाव घेवून पंचनामा केला. त्यानंतर चौधरी यांना शासकीय रुग्णालयात दाखल करण्यात आलं. याठिकाणी वैद्यकीय अधिकारी यांनी तपासणीनंतर त्यांना मृत घोषित केलं. ऐन गुढीपाडव्याच्या दिवशी दत्तू चौधरी यांनी आत्महत्ये सारखं टोकाचं पाऊल उचलल्यानं सर्व जण सुन्न झाले आहेत. आत्महत्येमागचं कारण कळू शकलेलं नाही. याप्रकरणी शनिपेठ पोलीस ठाण्यात अकस्मात मृत्यूची नोंद करण्यात आली आहे.
खेळण्याबागडण्याच्या वयात दोन्ही मुलांचे पितृछत्र हरपले
दत्तू चौधरी यांच्या पश्चात पत्नी मोनाली, मुलगा निखील (वय १२ वर्ष) व मुलगी परी (वय ९ वर्ष) असा परिवार आहे. वडिलांच्या मृत्यूने शिकण्या आणि खेळण्याबागड्याच्या वयात दोन्ही मुलांचं पितृछत्र हरपलं आहे. घटनेने परिसरात हळहळ व्यक्त केली जात आहे. पत्नी व मुलगी सकाळी कामाला गेले तेव्हा सर्व काही सुरळीत होते. कामावर गेल्यावर पती दत्तू चौधरी असं काही करतील, अशी पुसटशी कल्पनाही त्यांची पत्नी सोनाली यांना नव्हती. जिल्हा रुग्णालयात पत्नी सोनाली हिच्यासह दोन्ही मुलांनी प्रचंड आक्रोश केला. हा आक्रोश पाहून रुग्णालयात उपस्थित नातेवाईकांचेही डोळे पाणावले होते.
