बारामती : बारामती शहर व तालुका पोलिस ठाण्याच्या हद्दीतील लॉजवर गुरुवारी (२७ एप्रिल) अप्पर पोलिस अधीक्षक आनंद भोईटे यांनी अधिकारी-कर्मचाऱ्यांना सोबत घेत अचानक तपासणी केली. या तपासणीत काही लॉजवर महाविद्यालयीन युवक-युवती आढळून आले. त्यांना समज देऊन सोडण्यात आले.
शहर व एमआयडीसीतील १५ लॉजेसची पोलिसांकडून तपासणी करण्यात आली. त्यात महाविद्यालयीन युवक-युवतींसह प्रेमी युगुले मिळून आली. पोलिसांच्या या कारवाईमुळे लॉज चालकांचे धाबे दणाणले आहेत. या कारवाईत भोईटे यांच्यासह उपविभागीय पोलिस अधिकारी गणेश इंगळे, शहर पोलिस ठाण्याचे निरीक्षक सुनील महाडीक, तालुका पोलिस ठाण्याचे प्रभाकर मोरे यांच्यासह महिला व पुरुष पोलिस कर्मचाऱ्यांचा सहभाग होता.
शहरातील बहुसंख्य लॉजमध्ये चुकीच्या बाबी चालत असल्याच्या तक्रारी नागरिकांकडून केल्या जात होत्या. त्या अनुषंगाने ही तपासणी करण्यात आल्याचे अप्पर पोलिस अधीक्षक आनंद भोईटे यांनी सांगितले. महाविद्यालयीन युवक युवतींना समज देऊन सोडण्यात आले. त्यात काही अॅकेडमीच्या विद्यार्थी-विद्यार्थिनींचाही सहभाग होता. यापुढे अचानकपणे या तपासण्या सुरुच ठेवल्या जाणार आहेत असे भोईटे यांनी सांगितले.
बारामतीतील लॉज चालकांनी अल्पवयीन मुलांना प्रवेश दिल्याचे आढळल्यास त्यांच्यावर कायदेशीर कारवाई केली जाणार आहे. याशिवाय नगरपरिषदेच्या मुख्याधिकाऱ्यांना लॉजच्या इमारतीचे बांधकाम, त्याचे ऑडिट, तांत्रिक तपासण्या यासंबंधीची कागदपत्रे तपासण्यास सांगितले आहे. अशी माहिती अप्पर पोलिस अधीक्षक आनंद भोईटे यांनी दिली
