जळगाव : अमळनेर शहरात स्पिकरच्या आवाज कमी करण्यावरून झालेल्या वादातून चाकूने भोसकून तरुणाची हत्या करण्यात आली.तर दुसऱ्या घटनेत अमळनेर तालुक्यातील सावखेडा गावात दारूच्या नशेत असताना झालेल्या वादात तरुणावर कुऱ्हाडीने वार करून हत्या केल्याची धक्कादायक घटना समोर आली आहे. अमळनेर तालुक्यात सोमवारी एकाच दिवशी रात्री घडलेल्या या दोन हत्येच्या घटनांनी जळगाव जिल्हा पुरता हादरला आहे. एका घटनेतील संशयित आरोपीला अटक करण्यात आली आहे.
मिळालेल्या माहितीनुसार, पहिल्या घटनेत अमळनेर शहरातील दाजीबा नगरात कार्यक्रमात सुरू असलेला लाउडस्पीकरचा आवाज कमी करण्याच्या कारणावरून अक्षय राजू भील (वय २१) या तरुणाला सोमवारी रात्री पाच ते सहा जणांनी चाकूने भोसकून गंभीर जखमी केले होते. त्याला धुळे येथील शासकीय रूग्णालयात उपाचारार्थ दाखल केले असता उपचारादरम्यान त्याची प्राणज्योत मालवली.
ही घटना ताजी असतानाच त्याच दिवशी रात्रीच्याच वेळी दुसरी घटना घडली. अमळनेर तालुक्यातील सावखेडा गावातील वैदूवाड्यात रात्री साडेबारा वाजेच्या सुमारास नाना मंगलसिंग बारेला (वय २१) या तरूणाला वैयक्तिक वादातून संशयित आरोपी डेबूजी सुरसिंग बारेला (वय २२) याने कुऱ्हाडीने वार केले. यात नाना बारेला याचा जागीच मृत्यू झाला आहे.
नात्यातल्या मुलासोबत १९ वर्षीय तरुणीचे शारीरिक संबंध, स्वछतागृहात बाळाला जन्म देऊन कमोडमध्ये फेकलं!
घटनेची माहिती मिळाल्यानंतर, अमळनेर पोलीस ठाण्याचे पोलीस उपनिरीक्षक नरसिंग वाघ, पोहेकॉ सुनील जाधव, पोकॉ राहुल पाटील यांनी सावखेडा गावातील हत्या प्रकरणात संशयित आरोपी डेबूजी सुरसिंग बारेला याला ताब्यात घेतलं आहे. या दोन्ही घटनेमुळे जळगाव जिल्हा हादरला आहे. या प्रकरणी अमळनेर पोलीस ठाण्यात गुन्हा दाखल करण्याचे काम सुरू आहे.
