नागपूरात महिला आरटीओ निरीक्षकासह तिघांविरुद्ध लाच मागितल्याप्रकरणी गुन्हा दाखल करण्यात आला आहे
ट्रकचालकाकडून चारशे रुपयांची लाच मागितल्याप्रकरणी महिला आरटीओ निरीक्षकासह तिघांविरुद्ध भ्रष्टाचार प्रतिबंधक विभागाने रामटेक पोलिस ठाण्यात गुन्हा दाखल केला. जबलपूर महामार्गावरील कांद्री आरटीओ चेक पोस्टवर यवतमाळ एसीबीने सापळा रचत कारवाई केली.
अशी आहे घटना
प्राप्त माहितीनुसार, मोटार वाहन निरीक्षक (वर्ग २) गीता भास्कर शेजवळ, मुकुंद सोनकुसरे व राजेश भातखोरे अशी गुन्हा दाखल करण्यात आलेल्यांची नावे आहेत. शेजवळ यांनी सोनकुसरे आणि भातखोरे यांना चेकपोस्टवर वाहनचालकांकडून पैसे घेण्यासाठी ठेवले होते. गुरुवारी फिर्यादीचा ट्रक तेथे आला. तो जाऊ देण्यासाठी तेथील मुकुंद सोनकुसरे व राजेश भातखोरे यांनी चालकाला ४०० रुपये लाच मागितली. ट्रकचालकाने भ्रष्टाचार प्रतिबंधक विभागाचे अमरावती परिक्षेत्राचे पोलिस अधीक्षक मारुती जगताप, अपर अधीक्षक अरुण सावंत व देवीदास घेवारे यांच्याकडे तक्रार केली. त्यावरून गुन्हा दाखल करण्यात आला.
गीता शेजवळ यांनी सोनकुसरे व भातखोरे यांना शासकीय इमारतीमधील कक्ष उपलब्ध करून दिला होता. शेजवळ यांच्या ड्युटीच्या काळात हे दोघे ट्रकचालकाकडून रक्कम उकळत होते. कुणी पैसे देण्यास नकार दिल्यास दोघे शेजवळ यांना बोलवून घ्यायचे. एसीबीला याची कुणकूण लागली. त्यांनी या ट्रकचालकाला जबलपूर महामार्गावर पाठविले. यातेथे सोनकुसरे व भातखोरे या दोघांनी रकमेची मागणी केली. मात्र, चालकाने एवढी रक्कम देण्याबाबत असमर्थता व्यक्त केली. यामुळे शेजवळ यांना बोलवून घेण्यात आले. तडजोडीअंती ट्रक पुढे नेण्यासाठी ४०० रुपये देण्याचे ठरले. ही रक्कम देताच एसीबीच्या कर्मचाऱ्यांनी झडप घालून शेजवळ यांना ताब्यात घेतले
गीता शेजवळ यांचे पती अभिजित मांढरे हेदेखील निरीक्षक आहेत. फेब्रुवारीत मांढरे यांची पोस्टिंग कांद्री चेकपोस्टवरच होती. त्यांनाही एसीबीने अवैध वसुली करताना ताब्यात घेतले होते. त्यांनीही दोन खासगी व्यक्तींना वसुलीसाठी ठेवले होते.
