शिरपूर येथे मटकाअड्ड्यावर छापा; 10 संशयितांना अटक

शहरातील मेन रोडलगत बंद खोलीत सुरू असलेल्या मटकाअड्ड्यावर छापा टाकून पोलिसांनी अड्ड्याच्या मालकासह दहा जुगाऱ्यांना ताब्यात घेतले. ७ डिसेंबरला सायंकाळी ही कारवाई करण्यात आली.

कारवाईत रोकड, मटक्याचे साहित्य आदी मिळून ४९ हजार रुपयांचा मुद्देमाल पोलिसांनी जप्त केला

शहरातील पाचकंदील चौकातून बालाजी मंदिराकडे जाणाऱ्या रस्त्यावर असलेल्या इमारतीत बंद खोलीत मटका खेळविला जात होता. त्याबाबत पोलिस निरीक्षक ए. एस. आगरकर यांना माहिती मिळाली. त्यांनी सहकाऱ्यांसह छापा टाकला. इमारतीच्या वरच्या मजल्यावरील दोन बंद खोल्यांमध्ये अड्ड्याचा मालक दीपक सुरेश अग्रवाल दहा जणांसह मटका खेळवत असल्याचे आढळले.

संशयितांकडून तीन हजार २४० रुपये रोख, ३५ हजार रुपये किमतीचे सात अँड्रॉइड मोबाईल, आठ लहान मोबाईल, दोन प्रिंटर, पॅड, पेन, कॅल्क्युलेटरसह मटक्याच्या चिठ्ठ्या असा ४९ हजार ३७८ रुपये किमतीचा मुद्देमाल जप्त करण्यात आला.

पोलिस अधीक्षक श्रीकांत धिवरे, अपर अधीक्षक किशोर काळे, पोलिस उपअधीक्षक सचिन हिरे यांच्या मार्गदर्शनाखाली पोलिस निरीक्षक ए. एस. आगरकर, उपनिरीक्षक संदीप मुरकुटे, शोधपथकाचे हवालदार ललित पाटील, पोलिस नाईक रवींद्र आखडमल, योगेश दाभाडे, प्रशांत पवार, हवालदार जाधव, सोनवणे, मनोज बागूल व पंकज पाटील यांनी ही कारवाई केली.