रविवारी (ता.२१) मध्यरात्री नंदुरबार शहरातील जगतापवाडी चौफुली ते करण चौफुली दरम्यान पोलिस गस्तीवर असताना एका कार बाबत पथकाला संशय आला. त्यांनी कार थांबवून चौकशी केली असता. फारुक शेख शफी नावाचा व्यक्ती कारमध्ये होता. त्याच्याकडे गुजरात सरकारचा वाहन चालविण्याचा परवाना होता.
तसेच त्याच्या अंगात सैन्यातील अधिकारी असल्यासारखा गणवेशही होता. यावेळी पोलिसांनी त्याच्या कारची तपासणी केली असता त्यांच्याकडे अंदाजे एक लाख २० हजार रुपये किमतीचे विदेशी मद्य मिळून आले
तसेच मिनिस्ट्री ऑफ डिफेन्स गव्हर्नमेंट ऑफ इंडिया, लिक्योर डिमांड फॉर मिलिटरी कॅम्प ट्रूपर्स असे नाव असलेला त्यावर मिनिस्ट्री ऑफ गव्हर्नमेंट ऑफ इंडिया असा गोल व ऑफिसर कमांडींग ११०८ आर्म बीडीई कॅम्प फॉर को सी-०५६ एपीओ असा नाव असलेला चौकोनी स्टॅम्प असल्याचे कागदपत्र मिळून आले. तसेच आयकर विभागाचे ओळखपत्र, तसेच रोख ३३ हजार ७२० रुपये मोबाईल, आयफोन असा १४ लाख २० हजार २४० रुपये किमतीचा ऐवज आढळून आला.
संशयित शेख याने अवैध दारुची वाहतूक करण्यासाठी त्यांचे खांद्यावर राजमुद्रा असलेला भारतीय सेनेचा गणवेश परिधान करून लोकसेवक अधिकारी असल्याचे सांगून सैन्यदलातील बनावट कागदपत्रे तयार करत विदेशी मद्याची अवैधपणे वाहतूक केल्याप्रकरणी गुन्हा दाखल करण्यात आला.
