पुणे शहरात घडलेली 'हिट अँड रन'ची घटना ताजी असतानाच आज दुपारच्या सुमारास धुळे शहरातील एल.एम.सरदार हायस्कूल परिसरात भरधाव वेगाने जाणाऱ्या बारा चाकी ट्रकच्या मागील चाकाखाली येऊन एका तरुणाचा जागीच मृत्यू झाला आहे. अठरा वर्षीय राहुल सूर्यवंशी हा आपल्या दुचाकीवरून दत्तमंदिर चौकाच्या वाटेने अभय कॉलेजकडून घराकडे जात असताना ही दुर्दैवी घटना घडली आहे.
घटना घडताच भरधाव वेगाने जाणाऱ्या या ट्रकला नागरिकांनी शहरातील पंचवटी परिसरात अडवून ट्रक चालकाला पोलिसांच्या स्वाधीन केले आहे. तर पोलिसांनी या तरुणाचा मृतदेह पुढील प्रक्रियेसाठी रुग्णालयात पाठवला आहे. याप्रकरणी देवपूर पोलीस ठाण्यात गुन्हा दाखल करण्याचे काम सुरू आहे.
धुळे शहरात सकाळी आठ ते सायंकाळी आठ वाजेपर्यंत अवजड वाहनांना बंदी असताना देखील दुपारच्या सुमारास ही अवजड वाहनांची ये-जा सुरुच असते. अवजड वाहने बंदी काळात सर्रास शहरातील रस्त्यांवर धावत असल्याने पोलिसांच्या कारवाईवर प्रश्नचिन्ह निर्माण झाले आहे. यातच राहुल योगेश सूर्यवंशी हा तरुण भरधाव वेगाने जाणाऱ्या ट्रकच्या मागील चाकाखाली गेल्याने तो चिरडला गेला आहे. घटना घडताच नागरिकांनी घटनास्थळी एकच गर्दी केली होती. तर राहुलच्या वडिलांचे विश्वकर्मा गॅरेज नावाचे शहरात प्रसिद्ध दुकान आहे. या घटनेमुळे परिसरात एकच खळबळ उडाली आहे.
