धुळ्यातील एका अल्पवयीन मुलीचे लहान बहिण आणि भाऊ हे गजेंद्र अंपळकर यांच्या हर हर महादेव या व्यायाम शाळेत कुस्ती शिकण्यासाठी जात होते. या ठिकाणी प्रशिक्षक म्हणून कार्यरत असलेल्या रितिक उर्फ दादू राजेंद्र राजपूत पीडित तरुणीशी अंगलट करण्याचा प्रयत्न केला. तसेच ‘तू मला आवडतेस मला तुझ्याशी लग्न करायचे’ असे सांगून आग्रह धरला. ‘माझे ऐकले नाही तर तुझ्या परिवाराला जीवे ठार मारेल’ अशी धमकी ही दिली. १० जानेवारी रोजी याच कारणावरून पीडितेसह तिची आई आणि कुटुंबातील सदस्यांना रस्त्यात अडवून पुन्हा जबरदस्ती करण्याचा प्रयत्न करण्यात आला होता.
तसेच पीडित तरुणीशी अंगलट येण्याचाही प्रयत्न केला. आरडा ओरड करून स्वतःची सुटका करून घरी जात असताना भाजपा धुळे जिल्हाध्यक्ष गजेंद्र आंपळकर यांनी पोलिसात न जाण्याची धमकी दिली. मात्र तरीही पीडित तरुणीची बहीण आणि तिची आई दोन्ही भावांसह चाळीसगाव रोड पोलीस ठाण्यात गेले असता संबंधित पोलिसांनी त्यांची तक्रार नोंदवून घेतली नाही. याउलट माजी उपमहापौर कल्याणी अंपळकर यांनी दाखल केलेली खोटी तक्रार नोंदवून घेत फिर्यादी, तिची आई आणि दोन्ही भावांना अटक केली. त्यामुळे त्यांना रिमांड होममध्ये ठेवण्यात आले होते.
या गुन्ह्यात फिर्यादीच्या वडिलांचे ही नाव गोवण्यात आल्याचे फिर्यादीने म्हटले आहे. बाहेर आल्यानंतर पुन्हा चाळीसगाव रोड पोलिसांना विनंती करण्यात आली, मात्र त्यांनी नकार दिल्याने या संदर्भात न्यायालयात अर्ज दाखल करण्यात आला. यावर न्यायालयाने खातर जमा करून पोक्सोसह भा. दं. वी ३५४, ३२३, ५०४, ५०६(२), १४३, १४७, १४८, १४९ अन्वये गुन्हा दाखल करण्याचे आदेश दिले होते. त्यानुसार रात्री उशिरा भाजपाचे जिल्हाध्यक्ष गजेंद्र अंपडकर यांच्या विरोधात पोक्सो अंतर गुन्हा दाखल करण्यात आला आहे.
संशयित आरोपीमध्ये हर हर महादेव व्यायाम शाळेचा कुस्ती प्रशिक्षक दादू राजपूत, भाजपाचे जिल्हाप्रमुख गजेंद्र महादेव अंपळकर, माजी उपमहापौर कल्याणी सतीश अंपळकर, सुहास सतीश अंपळकर, जतिन उर्फ अजय आव्हाळे यांचा समावेश आहे. कोर्टामार्फत संबंधित पोलीस ठाण्यात गुन्हा दाखल करण्याचे आदेश देण्यात आले होते. या घटनेने धुळे जिल्ह्यातील सामाजिक आणि राजकीय वर्तुळात एकच खळबळ उडाली आहे.
