मुख्यमंत्री एकनाथ शिंदे यांच्या सभेनंतर जळगावमध्ये शिक्षकांना पैसे वाटत असल्याचा व्हिडीओ समोर आल्यानंतर आता नाशिक शिक्षक मतदारसंघाच्या निवडणूक पूर्वसंध्येला प्रत्येकी ५ हजार रुपये असलेले ४४ पाकीटे आढळून आली. आचारसंहिता पथकाने सव्वा दोन लाखांची रोकड जप्त केली असून चौकशीसाठी आठ जणांना ताब्यात घेतले आहे. . याप्रकरणी रात्री उशिरापर्यंत उपनगर पोलीस ठाण्यात गुन्हा दाखल करण्याची प्रक्रिया सुरू होती.
नाशिक शिक्षक मतदारसंघाची निवडणूक येत्या २६ जून रोजी होणार आहे. या निवडणुकीमध्ये सत्ताधारी विरोधकांमध्ये मोठी चुरस बघायला मिळत आहे. यादरम्यान शिक्षकांना मतांच्या प्रलोभनासाठी पतीला ड्रेस, पत्नीला साडी आणि नथ घरपोच गिफ्ट देण्यात येत असल्याचेही उघड झाले आहे.
नंदुरबार शहरातील कन्यादान मंगल कार्यालयाच्या जवळील एका घरातील पहिल्या मजल्यावर पैशाचे पाकिटे तयार करण्यात येत असल्याची माहिती आचारसंहिता पथकाला मिळाली. त्या माहितीच्या अनुषंगाने स्थानिक गुन्हे अन्वेषण शाखा, उपनगर पोलीस, महसूल विभाग, भरारी पथकाने धाड टाकली. त्या ठिकाणी काहीजण पाकिटात पैसे टाकून ते बंद करीत असल्याचे निदर्शनास आले. पथकाने घटनास्थळावरुन प्रत्येकी पाच हजार रुपये असलेली ४४ पाकीटे ताब्यात घेत २ लाख २० हजारांची रोकड हस्तगत केली आहे.
याप्रकरणी चौकशीसाठी ८ संशयितांना ताब्यात घेण्यात आले आहे. सर्व संशयित कोपरगाव येथील असल्याची माहिती सूत्रांकडून मिळाली. पोलिसांनी हस्तगत केलेल्या ४४ पाकिटांवर कोणाचेही नाव किंवा कोणाचाही उल्लेख नसल्याचे दिसून आले. मात्र, प्रत्येक पाकीटांमध्ये पाच हजारांची रोकड होती.
सदर कारवाई पोलीस अधीक्षक श्रवण दत्त एस, अप्पर पोलीस अधीक्षक निलेश तांबे यांच्या मार्गदर्शनाखाली स्थानिक गुन्हे शाखेचे पोलीस निरीक्षक किरणकुमार खेडकर, पोलीस उपनिरीक्षक मुकेश पवार, यांच्यासह भरारी पथकातील बळीराम चाटे, रवींद्र घोडके, उपनगर पोलीस निरीक्षक शाम निकम आदींच्या पथकाने केली आहे. दरम्यान, रात्री उशिरापर्यंत याप्रकरणी उपनगर पोलीस ठाण्यात गुन्हा दाखल करण्याचे काम सुरु होते
कॉलन्यांमध्ये आठ दिवसांपासून गर्दी
जिल्ह्यात गत आठ दिवसांपासून चौघा उमेदवारांकडून भेट वस्तू वाटपाची खिरापत सुरू आहे. यात महागडा पेन, सोन्याची नथ, पैठणी साडी, रेमंड, दिग्जाम, दिनेश या कंपन्याच्या महागड्या ड्रेस मटेरियलचा समावेश आहे. या भेटवस्तू शिक्षकांचे निवासस्थान शोधून प्रत्यक्ष दिले जात आहे. त्यामुळे अनेक कॉलन्यांमध्ये नवगत पत्ता विचारताना दिसत आहेत. त्यातून हा प्रकार उघडकीस आला. भेट वस्तू देणारा वरिष्ठांना लोकेशन टाकून वस्तू दिल्याचे कळवित आहे.
