आपण सर्व महाविकास आघाडीला गाडण्यासाठी एकत्र आलो आहोत. मविआने लोकसभा निवडणुकीत चुकीचा प्रचार करून, मतदारांना ब्लॅकमेल करून, या देशाचे संविधान बदलणार अशा अफवा पसरवल्या; दलित, आदिवासी आणि ओबीसींचे आरक्षण जाणार अशी बकवासगिरी करण्यात आल्याचा आरोप केंद्रीय मंत्री रामदास आठवले यांनी केला. ते कोल्हापुरातील महायुतीच्या प्रचार सभेत बोलत होते.
कोल्हापूरात महायुतीमधील भाजप, शिवसेना आणि राष्ट्रवादी काँग्रेस या पक्षांनी त्यांच्या प्रमुख नेत्यांच्या उपस्थितीत विधानसभा निवडणूक २०२४च्या प्रचाराचा नारळ फोडला. रामदास आठवले यांनी भाषणाची सुरुवातच कवितेने केली. आमची प्रेरणा आहे छत्रपती शिवाजी महाराज, डॉ.बाबासाहेब आंबेडकर आणि राजर्षी शाहू त्यांना महायुतीचे फुले वाहू, महाविकास आघाडीकडे पाहू आणि आपण सर्वजण महायुतीसोबत राहू.
उद्धव ठाकरे तुम्ही तिकडे गेला, पण तुम्ही तिकडे जायला नको होते. पण उद्धव ठाकरे तिकडे केले आणि धनुष्यबाण इकडे आले. शरद पवार तिकडे केले आणि घड्याळ इकडे आले. आणि देवेंद्र फडणवीस इथेच राहिले त्यामुळे कमळ देखील इथेच राहिले, असे रामदास आठवले म्हणाले. नरेंद्र मोदींच्या विकासाच्या कार्यक्रमाला शरद पवारांनी पाठिंबा द्यायला हवा होता. आपण त्यांना इकडे या असे सांगितले. अजितदादा देखील सांगत होते. तुम्हाला उद्धव ठाकरे चालतात तर मग भाजप का नाही असा सवाल आठवले यांनी यावेळी शरद पवारांना केला.
भाषण कविता आणि आठवले....
महाविकास आघाडी वाले बात करते है बडी बडी; लेकिन चुनकर आयेगा कमळ, धनुष्यबाण और घडी घडी. नरेंद्र मोदीजी की विकास की गाडी गाडी और एकनाथ शिदें और मैंने बढाई ये दाढी दाढी...
या सरकारने काम केले लय भारी, कारण गावा गावात जागी झाली नारी; आता आम्ही करणार आहोत महाराष्ट्राची वारी, पुन्हा एकदा सत्तेत महायुतीची बारी.
