भडगाव | प्रतिनिधी
तालुक्यातील विविध शिक्षण संस्थांमध्ये बोगस पदवी, अपात्र उमेदवार, बनावट TET प्रमाणपत्रांच्या आधारे झालेल्या शिक्षकभरती प्रकरणात मोठ्या आर्थिक घोटाळ्याचे गंभीर आरोप पुढे आले आहेत. सुमारे २५० शिक्षकांच्या अप्रूव्हल फाईलींमध्ये बनावट कागदपत्रांचा वापर करून २०१२ नंतरच्या भरतीत कोट्यवधी रुपयांचा सरकारी निधी गबाळल्याचा आरोप करण्यात आला आहे.
या घोटाळ्याबाबत सामाजिक कार्यकर्ते विजय पाटील (भडगाव) यांनी दिलेल्या तक्रारीनंतर विशेष चौकशी पथक (S.I.T) ने चौकशी प्रक्रियेला वेग दिला आहे
तक्रारदाराची S.I.T समितीसमोर चौकशी
दि. २० नोव्हेंबर २०२५ रोजी तक्रारदार विजय पाटील यांना S.I.T समितीसमोर हजर राहण्यास बोलावण्यात आले. यावेळी त्यांनी सर्व संबंधित कागदपत्रे समितीकडे सादर केली. पुढील टप्प्यात अपात्र व बोगस शिक्षकांच्या अप्रूव्हल फाईलींची सखोल चौकशी करण्याचे आश्वासन समितीने दिल्याची माहिती पाटील यांनी दिली.
माहिती अधिकारांतर्गत मागितलेल्या फाईली नाकारल्या
शिक्षण विभागाने RTI अंतर्गत फाईली न देण्याचा निर्णय घेतल्याचा आरोप
दोन वेळा समितीकडेही आवश्यक दस्तऐवज पोचवण्यात टाळाटाळ
जिल्हा पोलिस अधीक्षकांचे आदेश असूनही जळगाव शहर पोलीस स्टेशनने गुन्हा दाखल करण्यास टाळाटाळ केल्याची माहिती तक्रारदारांनी दिली
संस्थाचालक, शिक्षक व अधिकाऱ्यांवर कारवाईची मागणी
या प्रकरणात तक्रारदारांनी संस्थाचालक, बनावट शिक्षक तसेच संबंधित शिक्षण अधिकाऱ्यांवर गुन्हे दाखल करावेत, अशी ठाम भूमिका घेतली आहे.
न्यायालयात याचिका दाखल होणार
तक्रारदार विजय पाटील यांनी सांगितले की,
“भडगावातील बोगस शिक्षकभरती घोटाळ्यातील आरोपींना वाचवण्याचा प्रयत्न सुरु आहे. आम्ही न्यायालयात याचिका दाखल करून सत्य बाहेर आणणार.”
मुख्य आरोप एक नजरेत
मुद्दा तपशील
बोगस शिक्षक संख्या अंदाजे २५०
गैरव्यवहार काळ २०१२ नंतर
गुन्ह्याचे स्वरूप बनावट TET, बोगस पदव्या, आर्थिक फसवणूक
अंदाजे नुकसान कोट्यवधी रुपये
मागणी आरोपींवर गुन्हे नोंद व शिक्षण विभागाचा ऑडिट
या चौकशीमुळे तालुक्यातील शिक्षण व्यवस्थेतील भ्रष्टाचाराचे जाळे उघडे पडण्याची दाट शक्यता व्यक्त होत आहे. पुढील काही दिवसांत या प्रकरणाला नवे वळण मिळण्याची शक्यता वर्तवली जात असून, सर्वांचे लक्ष आता S.I.T च्या अहवालाकडे लागले आहे.
