शिरपूर/प्रतिनिधी. अंंधश्रद्धेच्या विळख्यातून रक्तरंजित कट; वर्षभरानंतर मोठा खुलासा
काँग्रेसच्या आंदोलनात असतानाच यशवंत सिलावट पोलिसांच्या ताब्यात, दोन दिवसांची कोठडी
धुळे जिल्ह्यातील शिरपूर तालुक्यात घडलेल्या ‘पैशांचा पाऊस’ प्रकरणाने एक वर्षानंतर पुन्हा एकदा खळबळ उडवली आहे. जंगलात मांत्रिक विधीतून पैसे पाडण्याच्या अंधश्रद्धेने सुरू झालेला हा प्रकार थेट गोळीबार आणि हत्या प्रयत्नापर्यंत पोहोचला होता. आता या थरारक गुन्ह्यात मध्यप्रदेशचे माजी मंत्री हिरालाल सिलावट यांचा मुलगा आणि काँग्रेसचा माजी युथ काँग्रेस प्रदेश महासचिव यशवंत सिलावट याला अखेर अटक करण्यात आली आहे.
पैशांचा पाऊस पाडण्याचं आमिष, दीड लाखांची ‘डील’
शिरपूर तालुक्यातील सलाईपाडा परिसरातील दुर्गम जंगलात मांत्रिक पैशांचा पाऊस पाडतो, अशी अफवा पसरली होती. या आमिषाला बळी पडत गणेश रामदास चौरे (३०, रा. बऱ्हाणपूर) आणि त्याच्या सहकाऱ्यांनी कथित मांत्रिक गुलजारसिंग पारसिंग पावरा (५७) याच्याशी संपर्क साधला.
विधीसाठी दीड लाख रुपये देण्याचा सौदा ठरला. जंगलात विधीही झाला, पण अपेक्षित ‘चमत्कार’ घडला नाही.
पैसे परत मागितल्यावर जंगलातच गोळीबार
विधीनंतर पैशांचा पाऊस न पडल्याने वाद पेटला. दिलेले पैसे परत मागितल्यावर गुलजारसिंगने फक्त ५० हजार रुपये परत करण्याची तयारी दाखवली. यावरून वाद विकोपाला गेला.
याच क्षणी मारहाण, धमकावणे आणि थेट गोळीबार करण्यात आला. गुलजारसिंग पावरा आणि शिवा पावरा हे गंभीर जखमी झाले. जंगलातच त्यांना ठार मारण्याचा प्रयत्न करून हल्लेखोर पसार झाले.
जखमींचा जीव वाचला; अंधश्रद्धा निर्मूलन कायद्यान्वये गुन्हा
जखमींना खासगी रुग्णालयात दाखल करण्यात आले. गुलजारसिंग पावरा यांच्या तक्रारीवरून शिरपूर तालुका पोलीस ठाण्यात गंभीर गुन्हे दाखल झाले.
दरम्यान, पैशांचा पाऊस पाडण्याचं आमिष दाखवून फसवणूक केल्याप्रकरणी गुलजारसिंग पावरा व शिवा पावरा यांच्यावर अंधश्रद्धा निर्मूलन कायद्यान्वये स्वतंत्र गुन्हा नोंदवण्यात आला.
मध्यप्रदेशात छापे, आरोपी एकामागोमाग जेरबंद
या प्रकरणाचा तपास करताना शिरपूर पोलिसांचे पथक मध्यप्रदेशात रवाना झाले. बऱ्हाणपूर व खंडवा येथून
गणेश चौरे
रतीलाल गणपत तायडे
अंकित अनिल तिवारी
विशाल करणसिंग कश्यप
यांना अटक करण्यात आली होती.
आंदोलनातूनच अटक! सिलावटचा थरारक शेवट
या गुन्ह्याचा धागा थेट राजकीय वर्तुळात पोहोचला. खंडवा येथे केंद्र सरकारविरोधात आयोजित काँग्रेसच्या आंदोलनात सहभागी असलेले यशवंत सिलावट यांना रविवारी दुपारीच महाराष्ट्र पोलिसांनी कोतवाली पोलिसांच्या मदतीने आंदोलनस्थळावरून ताब्यात घेतले.
चौकशीनंतर धुळे जिल्ह्यातील शिरपूर तालुका पोलिसांनी त्यांना औपचारिक अटक केली. न्यायालयाने दोन दिवसांची पोलीस कोठडी सुनावली आहे.
राजकीय नाव, अंधश्रद्धा अन् गुन्हेगारी यांचा धोकादायक संगम
अंधश्रद्धेच्या नावाखाली पैशांची लालसा, जंगलात रचलेला कट, गोळीबार आणि आता माजी मंत्र्याच्या मुलाची अटक—या प्रकरणाने कायदा, राजकारण आणि गुन्हेगारी यांचा धोकादायक संगम उघड केला आहे.
या प्रकरणातील इतर धागेदोरे, आर्थिक व्यवहार आणि कटातील भूमिका याबाबत पोलिसांचा तपास सुरू असून, पुढील खुलासे आणखी धक्कादायक ठरण्याची शक्यता आहे.
