मान्यवरांच्या उपस्थितीत प्रकाशन सोहळा
कार्यक्रमाच्या अध्यक्षस्थानी माजी संचालक, कृषी उत्पन्न बाजार समिती शिरपूरचे आदरणीय नानासाहेब ओंकार दशरथ पाटील होते. प्रमुख पाहुणे म्हणून छत्रपती शिवाजी महाराज स्मारक समिती तऱ्हाडीचे उपाध्यक्ष दादासाहेब गुलाबराव भालकर, ग्रामपंचायत तऱ्हाडीचे गटनेते जिभाऊ सो. भिका चतुर भामरे, तसेच सेवानिवृत्त जलसंधारण अधिकारी दादासाहेब दाजमल सखाराम अहिरे उपस्थित होते.
याचबरोबर मराठी दक्ष पत्रकार संघ, महाराष्ट्र राज्याचे संस्थापक अध्यक्ष अण्णासाहेब दिनकर भिला पवार, कृषी मित्र किरण भामरे, सामाजिक कार्यकर्ते भावनेश पाटील, माजी संचालक पीक संरक्षण सोसायटी रघुनाथ बोरसे, माजी चेअरमन विशाल करंके यांच्यासह गावातील असंख्य नागरिक मोठ्या संख्येने उपस्थित होते.
प्रतिमापूजनातून प्रारंभ, टाळ्यांच्या गजरात प्रकाशन
कार्यक्रमाची सुरुवात छत्रपती शिवाजी महाराजांच्या प्रतिमेचे पूजन व अभिवादन करून झाली. त्यानंतर मान्यवरांच्या हस्ते ‘मासिक सत्यशोधक प्रतिशब्द’ विशेषांकाचे औपचारिक प्रकाशन करण्यात आले. प्रकाशन होताच सभागृहात टाळ्यांचा कडकडाट आणि घोषणांचा जल्लोष उसळला.
अध्यक्षीय भाषणात शिवकार्याचा परामर्श
अध्यक्षीय भाषणात नानासाहेब पाटील यांनी छत्रपती शिवाजी महाराजांच्या लोककल्याणकारी राज्यकारभाराचा, स्वराज्य संकल्पनेचा आणि बहुजन समाजासाठी दिलेल्या योगदानाचा सखोल परामर्श घेतला. त्यांनी आजच्या सामाजिक परिस्थितीत सत्यशोधक विचारांची नितांत गरज अधोरेखित करत युवकांनी वैचारिक जागरूकता आणि सामाजिक जबाबदारी स्वीकारावी, असे आवाहन केले.
सत्यशोधक विचारांचा प्रचार-प्रसार
कार्यक्रमाचे प्रास्ताविक ॲडव्होकेट रवींद्र अहिरे यांनी प्रभावी शब्दांत केले. त्यांनी ‘सत्यशोधक प्रतिशब्द’ या विशेषांकामागील भूमिका, उद्दिष्टे आणि समाजप्रबोधनाची दिशा स्पष्ट केली.
आभार प्रदर्शन रवी कुमार पेंडारकर यांनी केले.
यावेळी ‘फुले, शाहू, आंबेडकर’ या वैचारिक परंपरेचे अभ्यासक व संपादक ॲडव्होकेट रमेश ईशी यांचीही उपस्थिती लाभली.
कचरू अहिरे यांचे परिश्रम ठरले फलदायी
या संपूर्ण कार्यक्रमाच्या यशस्वी आयोजनासाठी सत्यशोधक जन आंदोलन महाराष्ट्रचे पूर्णवेळ कार्यकर्ते तसेच मासिक सत्यशोधक प्रतिशब्दचे संपादक प्रा. कचरू अहिरे यांनी विशेष परिश्रम घेतले. त्यांच्या नियोजनबद्ध मार्गदर्शनामुळे हा सोहळा वैचारिक, प्रेरणादायी आणि समाजजागृतीचा संदेश देणारा ठरला.
एकूणच, तऱ्हाडी येथे छत्रपती शिवाजी महाराज जयंतीनिमित्त पार पडलेला हा विशेषांक प्रकाशन सोहळा केवळ औपचारिक कार्यक्रम न ठरता सत्यशोधक विचारांची मशाल अधिक प्रखर करणारा आणि बहुजन चळवळीला नवी दिशा देणारा ऐतिहासिक क्षण ठरला, अशी भावना उपस्थित मान्यवरांनी व्यक्त केली.
