स्वच्छता विभागावर गाजला ‘कारवाईचा बडगा’
ही कठोर कारवाई प्रामुख्याने स्वच्छता विभागातील अधिकाऱ्यांवर करण्यात आली आहे. शहरातील कचऱ्याचे ढीग, दुर्गंधी आणि वाढत्या अस्वच्छतेमुळे नागरिकांच्या संतापाचा उद्रेक होत असताना प्रशासनावर प्रचंड दबाव निर्माण झाला होता. अखेर या निष्काळजीपणाचा फटका संबंधित अधिकाऱ्यांना बसला आहे.
निलंबितांमध्ये मुख्य स्वच्छता निरीक्षक, स्वच्छता निरीक्षक आणि मुकादम पदावरील कर्मचाऱ्यांचा समावेश आहे. प्रशासनाने स्पष्ट संदेश दिला आहे – कामात ढिलाई चालणार नाही, अन्यथा थेट कारवाई होईल!
कायद्याचा चाबूक – बडतर्फीचीही शक्यता
ही कारवाई महाराष्ट्र महानगरपालिका अधिनियम कलम ५६(२) तसेच महाराष्ट्र नागरी सेवा (शिस्त व अपील) नियम, १९७९ अंतर्गत करण्यात आली आहे. निलंबित कर्मचाऱ्यांना एक महिन्याची ‘शेवटची संधी’ देण्यात आली असून, या कालावधीत सुधारणा न झाल्यास थेट बडतर्फीची शिफारस करण्यात येणार असल्याचे स्पष्ट आदेश देण्यात आले आहेत.
निलंबन काळात संबंधितांना मुख्यालयाची परवानगीशिवाय बाहेर जाण्यास बंदी घालण्यात आली असून, त्यांच्या सेवापुस्तकातही या कारवाईची नोंद होणार आहे.
निलंबित अधिकाऱ्यांची यादी
या कारवाईत खालील अधिकारी-कर्मचारी जाळ्यात सापडले आहेत:
मुख्य स्वच्छता निरीक्षक : राजेश वसावे, लक्ष्मण पाटील, चंद्रकांत जाधव
स्वच्छता निरीक्षक : गौतम गोयर, रुपेश पवार, सौजाद शेख, आसिफ बेग, अर्जुन जाधव
प्रभारी निरीक्षक : अनिल जावडेकर
मुकादम : आकाश चांगरे, चेतन गोयर, कैलास पाटील, साजित सिकंदर शेख, किशोर मोरे, दत्तात्रय माळी, सफर बेग
नागरिकांच्या संतापाचा स्फोट – आंदोलनाचा इशारा
शहरातील अस्वच्छतेमुळे नागरिक त्रस्त झाले होते. रस्त्यांवर साचलेला कचरा, पसरलेली दुर्गंधी आणि वाढते संसर्गजन्य आजार यामुळे प्रशासनावर जोरदार टीका होत होती. विविध राजकीय पक्षांनीही आंदोलनाचा इशारा दिला होता. या वाढत्या दबावामुळे प्रशासनाला अखेर कठोर भूमिका घ्यावी लागली.
आरोग्य धोक्यात – शहर संकटाच्या उंबरठ्यावर?
कचऱ्याचे ढीग आणि अस्वच्छतेमुळे शहरात संसर्गजन्य आजारांचा धोका वाढला असल्याची भीती व्यक्त केली जात आहे. वेळेत उपाययोजना न झाल्यास परिस्थिती आणखी गंभीर होऊ शकते, असा इशारा तज्ज्ञांकडून देण्यात येत आहे.
पुढे काय?
ही कारवाई केवळ ‘इशारा’ आहे की प्रशासनातील मोठ्या साफसफाईची सुरुवात? निलंबित अधिकारी सुधारतील की बडतर्फीची कारवाई होईल? आणि सर्वात महत्त्वाचे म्हणजे – धुळेकरांना स्वच्छ शहर मिळणार का?
याकडे संपूर्ण शहराचे लक्ष लागले आहे…
