“सुनेच्या रक्ताने माखलेले हात… पुण्यात खून करून सासरा जळगावात लपला; एलसीबीच्या जाळ्यात अखेर अडकला!”पुणे हादरवणाऱ्या कौटुंबिक हत्याकांडाचा थरारक उलगडा; मेहरुणमध्ये आरोपीला बेड्या

जळगाव | प्रतिनिधी :- पुणे शहराला हादरवून सोडणाऱ्या सुनेच्या निर्घृण खून प्रकरणातील फरार आरोपी सासऱ्याला जळगाव स्थानिक गुन्हे शाखेने (LCB) थरारक कारवाई करत मेहरुण परिसरातून अटक केली. तब्बल आठ दिवस पोलिसांना चकवा देत फिरणारा आरोपी अखेर जळगाव पोलिसांच्या सापळ्यात अडकला. भानुदास भास्कर चौधरी असे अटक करण्यात आलेल्या आरोपीचे नाव असून, त्याला पुढील कारवाईसाठी पुणे पोलिसांच्या ताब्यात देण्यात आले आहे.

या घटनेमुळे पुण्यासह जळगाव जिल्ह्यातही मोठी खळबळ उडाली असून, कौटुंबिक वादातून घडलेल्या या रक्तरंजित प्रकरणाने नागरिकांमध्ये संतापाची लाट उसळली आहे.

घरातील किरकोळ वाद ठरला जीवघेणा

पोलिसांनी दिलेल्या माहितीनुसार, पुण्यातील रायकर मळा परिसरात राहणाऱ्या भानुदास चौधरी याने २ मे २०२६ रोजी घरगुती कारणातून संतापाच्या भरात स्वतःच्या सून स्वाती तेजस चौधरी हिच्यावर जीवघेणा हल्ला केला. तिच्या डोक्यावर गंभीर वार करण्यात आल्याने तिचा जागीच मृत्यू झाला.

धक्कादायक बाब म्हणजे, रक्ताच्या थारोळ्यात पडलेल्या सुनेला तसेच सोडून आरोपीने घराला बाहेरून कुलूप लावले आणि तेथून पलायन केले. घरात उपस्थित असलेल्या लहान मुलाच्या रडण्याचा आवाज ऐकून शेजाऱ्यांना संशय आला. त्यांनी तातडीने स्वातीच्या पतीला माहिती दिली. घर उघडून पाहिले असता स्वाती मृत अवस्थेत आढळून आली आणि परिसरात एकच खळबळ उडाली.

या प्रकरणी पुण्यातील नांदेड सिटी पोलीस ठाण्यात भारतीय न्याय संहिता (BNS) कलम 103(1) अंतर्गत खुनाचा गुन्हा दाखल करण्यात आला होता.

आठ दिवस पोलिसांना चकवा… पण एलसीबीसमोर टिकला नाही

खून केल्यानंतर आरोपी भानुदास चौधरी हा जळगावात येऊन लपल्याची माहिती पोलिसांना मिळाली होती. मात्र तो सतत ठिकाण बदलत असल्याने पोलिसांसमोर मोठे आव्हान निर्माण झाले होते.

दरम्यान, जळगाव एलसीबीचे वरिष्ठ पोलीस निरीक्षक राहुल गायकवाड यांना गोपनीय सूत्रांकडून महत्त्वाची माहिती मिळाली. आरोपी मेहरुण परिसरातील महादेव मंदिराजवळ वास्तव्य करत असल्याचे समजताच पोलिसांनी गुप्त सापळा रचला.

शनिवारी रात्री एलसीबीच्या पथकाने धाड टाकत आरोपीला ताब्यात घेतले. पोलिसांच्या या कारवाईमुळे फरार आरोपीचा अखेर खेळ संपला.

जळगाव एलसीबीची धडाकेबाज कारवाई

ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि उपविभागीय पोलीस अधिकारी नितीन गणापुरे यांच्या मार्गदर्शनाखाली पार पडली.

वरिष्ठ पोलीस निरीक्षक राहुल गायकवाड यांच्या नेतृत्वाखाली पीएसआय शरद बागल, अतुल वंजारी, विजय पाटील, अकरम शेख, नितीन बाविस्कर, प्रविण भालेराव, मुरलीधर धनगर, राहूल रगडे, रविंद्र कापडणे आणि प्रदीप चौरे यांच्या पथकाने ही यशस्वी मोहीम फत्ते केली.

कौटुंबिक नात्यांवर काळी सावली

घरगुती वादातून थेट खुनापर्यंत पोहोचलेली ही घटना समाजासाठी धोक्याची घंटा मानली जात आहे. ज्या घरात विश्वास, माया आणि नात्यांचा आधार असतो, त्याच घरात रक्तरंजित संघर्ष घडल्याने नागरिकांमध्ये भीतीचे वातावरण निर्माण झाले आहे.

पुणे पोलिसांकडून आरोपीची सखोल चौकशी सुरू असून, या प्रकरणामागील नेमके कारण आणि पूर्वीचे कौटुंबिक वाद याबाबत तपास अधिक तीव्र करण्यात आला आहे.