या प्रकरणामुळे जळगाव पोलिस यंत्रणा सतर्क झाली असून शहरात बेकायदेशीरपणे वास्तव्यास असलेल्या परदेशी नागरिकांविरोधात मोठी मोहीम उघडण्यात आली आहे. शनिपेठ पोलिसांच्या कारवाईनंतर संपूर्ण शहरात या प्रकरणाची जोरदार चर्चा सुरू झाली आहे.
गुप्त माहिती आणि पोलिसांचा छापा
जळगाव शहरातील भोई गल्ली, जोशी पेठ परिसरात एक परदेशी महिला संशयास्पदरीत्या राहत असल्याची माहिती पोलिसांना मिळाली होती. त्यानंतर शनिपेठ पोलिसांनी सापळा रचत संबंधित ठिकाणी छापा टाकला. पोलिसांना तेथे 20 वर्षीय कोणीका राणी शामलचंद्र राय ही तरुणी आढळून आली.
तपासादरम्यान तिच्याकडे भारतात राहण्यास आवश्यक असलेले कोणतेही वैध कागदपत्र, व्हिसा किंवा अधिकृत परवानगी नसल्याचे स्पष्ट झाले. पोलिसांनी तिला ताब्यात घेत चौकशी सुरू केली आणि त्यानंतर उघड झालेली माहिती ऐकून तपास अधिकाऱ्यांनाही धक्का बसला.
सोशल मीडियावरून जुळलं प्रेम
तपासात समोर आलेल्या माहितीनुसार, जळगावातील सोने कारागीर चिन्मय जगन्नाथ वाला याची आणि कोणीका राणीची ओळख सोशल मीडियावरून झाली होती. सुरुवातीला फेसबुकवर मैत्री झाली, त्यानंतर दोघांमध्ये सातत्याने संवाद वाढत गेला आणि या ओळखीचे रूपांतर प्रेमात झाले.
प्रेम इतकं वाढलं की कोणीका हिने थेट बांगलादेशातून भारतात येण्याचा निर्णय घेतला. सीमा ओलांडताना तिने जंगल मार्गाचा वापर केल्याची माहिती तपासातून समोर आली आहे. काही दलाल आणि स्थानिक व्यक्तींनी तिला मदत केल्याचाही संशय पोलिस व्यक्त करत आहेत.
जंगल मार्गाने भारतात प्रवेश?
प्राथमिक चौकशीत कोणीका राणीने धक्कादायक खुलासा केला. प्रेमासाठी तिने बांगलादेशातून पळ काढला आणि जंगल मार्गाने भारतात प्रवेश केला. पश्चिम बंगालमध्ये प्रियकरासोबत विवाह केल्याचा दावा तिने केला असला तरी लग्नाचे कोणतेही अधिकृत दस्तऐवज पोलिसांना अद्याप सापडलेले नाहीत.
त्यानंतर दोघे जळगावात येऊन राहत होते. चिन्मय हा जळगावात काम करत असल्याने कोणीका त्याच्यासोबत शहरात वास्तव्यास होती. मात्र पोलिसांच्या गुप्त माहितीमुळे अखेर हा संपूर्ण प्रकार उघडकीस आला.
पोलिसांचा मोठा खुलासा
जळगावचे पोलीस अधीक्षक श्रीकांत धिवरे यांनी पत्रकार परिषदेत या कारवाईची माहिती देताना सांगितले की, बेकायदेशीररीत्या भारतात राहत असलेल्या बांगलादेशी आणि इतर परदेशी नागरिकांविरोधात विशेष मोहीम सुरू आहे.
तपासादरम्यान संबंधित महिलेकडून बांगलादेशी पासपोर्ट जप्त करण्यात आला. मात्र भारतात प्रवेशासाठी आवश्यक असलेली वैध प्रक्रिया पूर्ण करण्यात आलेली नव्हती. त्यामुळे कोणीका राणी आणि तिच्यासोबत राहणारा चिन्मय वाला या दोघांविरुद्ध इमिग्रेशन व परदेशी नागरिक कायद्यांतर्गत गुन्हा दाखल करण्यात आला आहे.
न्यायालयात हजर; पोलीस कोठडी
अटकेनंतर कोणीका राणीला जळगाव न्यायालयात हजर करण्यात आले. न्यायालयाने तिला एक दिवसांची पोलीस कोठडी सुनावली आहे. या प्रकरणाचा तपास सहाय्यक पोलीस निरीक्षक साजिद मन्सूरी करत असून, सीमापार घुसखोरीत आणखी कोणाचा सहभाग आहे का याचा शोध सुरू आहे.
“सीमा हैदर” प्रकरणाची आठवण
या संपूर्ण घटनेमुळे काही वर्षांपूर्वी चर्चेत आलेल्या सीमा हैदर प्रकरणाची आठवण पुन्हा ताजी झाली आहे. सोशल मीडियावरून जुळलेलं प्रेम, सीमापार प्रवास आणि भारतात गुपचूप वास्तव्यास राहण्याचा प्रकार पुन्हा एकदा समोर आल्याने सुरक्षा यंत्रणांचीदेखील चिंता वाढली आहे.
शहरात खळबळ; सुरक्षा यंत्रणा सतर्क
या घटनेनंतर जळगाव शहरात मोठी खळबळ उडाली आहे. पोलिसांनी आता शहरातील परदेशी नागरिकांच्या वास्तव्याची पडताळणी मोहीम अधिक तीव्र केली असून संशयितांवर लक्ष ठेवण्याचे आदेश देण्यात आले आहेत.
प्रेमासाठी सीमा पार करणाऱ्या या तरुणीची कहाणी सध्या संपूर्ण जिल्ह्यात चर्चेचा विषय ठरत असली तरी, बेकायदेशीर घुसखोरीचा गंभीर मुद्दा पुन्हा ऐरणीवर आला आहे.
