चोपडा तालुक्यातील मितावली येथील तक्रारदाराचे वाळूचे ट्रॅक्टर आहे. तापी नदीतून वाळूची चोरटी वाहतूक करू देण्यासाठी व ट्रॅक्टरवर कारवाई न करण्याच्या मोबदल्यात तलाठी भूषण पाटील याने दरमहा १० हजार रुपयांची लाच मागितली. तक्रारदाराने याबाबत जळगाव लाचलुचपत प्रतिबंधक विभागाकडे तक्रार केली होती. जळगाव लाचलुचपत प्रतिबंधक विभागाने तक्रारीची पडताळणी करून बुधवारी चोपडा तहसील आवारात सापळा रचला. तक्रारदार व तलाठ्यात ठरल्याप्रमाणे १० हजार रुपयांचा पहिला हप्ता घेताना देवगाव तलाठी भूषण पाटील यास लाचलुचपत प्रतिबंधक विभागाच्या कर्मचार्यांनी रंगेहात अटक केली.नाशिक परिक्षेत्राचे पोलीस अधीक्षक सुनील कडासने, अप्पर पोलीस अधीक्षक एन. एस. न्याहळदे, पोलीस उपअधीक्षक सतीश भामरे यांच्या मार्गदर्शनाखाली जळगाव लाचलुचपत प्रतिबंधक विभागाचे पोलीस उपअधीक्षक शशिकांत पाटील ,पोलीस निरीक्षक संजोग बच्छाव , पोलीस निरीक्षक एन.एन.जाधव, सहायक फौजदार सुरेश पाटील, अशोक अहिरे, सुनील पाटील ,शैला धनगर, मनोज जोशी, जनार्दन चौधरी, प्रवीण पाटील ,महेश सोमवंशी नासीर, देशमुख, ईश्वर धनगर, प्रदीप पोळ, यांच्या पथकाने ही कारवाई केली.
दरम्यान, तलाठी भूषण पाटील याला दोन वर्षापूर्वीच नोकरी लागली होती. ही नोकरी करत असताना पैशांचा मोह भोवला व दोन वर्षांतच लाच घेतल्याप्रकरणी पोलिसांच्या कारवाईला सामोरे जावे लागलं आहे, अशीही माहिती पोलिसांकडून मिळाली आहे.
