उपासमारीची वेळ आल्यानं एसटी चालकाने केलं विष प्राशन; प्रकृती चिंताजनक

धुळे आगारातील चालक पदावर असलेल्या रविंद्र रघुनाथ पवार या एसटी कर्मचाऱ्याने विष प्राशन करून आत्महत्या करण्याचा प्रयत्न केला. विष प्राशन केलेल्या आंदोलक एसटी कर्मचाऱ्याची प्रकृती चिंताजनक असल्याची माहिती समोर आली आहे. कुटुंबियांनी तात्काळ शासकीय रुग्णालयामध्ये उपचारासाठी दाखल केले असून त्यांच्यावर शासकीय रुग्णालयमध्ये सध्या उपचार सुरू आहेत.एसटी महामंडळाचे राज्य शासनामध्ये विलगीकरण करण्यात यावे यासाठी गेल्या साडेतीन ते चार महिन्यांपासून एसटी कर्मचाऱ्यांचे आंदोलन सुरू आहे. आणि त्या दरम्यान जवळपास चार महिन्यांपासून एसटी प्रशासनातर्फे या आंदोलक एसटी कर्मचाऱ्यांचे वेतन देण्यात आले नसल्यामुळे आंदोलक एसटी कर्मचाऱ्यांच्या कुटुंबीयांवर आर्थिक संकट ओढवल आहे. कुटुंबीयांवर उपासमारीची वेळ ओढवली असून घरात आर्थिक चणचण मोठ्या प्रमाणात भासत असल्याने नैराश्यातून या आंदोलक एसटी कर्मचाऱ्याने टोकाच पाऊल उचलले असल्याचे कुटुंबियांनी स्पष्ट केले आहे. एसटी प्रशासनातर्फे यासंदर्भात गांभीर्याने दखल घेण्यात यावी अशी मागणी देखील कर्मचाऱ्याच्या कुटुंबियांनी केली आहे.