धुलीवंदन आणि रंगपंचमीच्या दिवशी मद्याला मोठी मागणी असते. या पार्श्वभूमीवर गोवा राज्यातून दारूची अवैध वाहतूक होण्याची शक्यता लक्षात घेत राज्य उत्पादन शुल्काच्या सोलापूर विभागाकडून विशेष पथके नेमण्यात आली होती. सदर पथकाकडून सीमेवर कडक पहाऱ्यासह गस्त घालण्यात येत होती.यादरम्यान १८ मार्च रोजी राज्य उत्पादन शुल्क विभाग, सोलापूरचे अधीक्षक नितीन धार्मिक यांच्या नेतृत्वाखाली उपअधीक्षक आदित्य पवार, भरारी पथकाचे दुय्यम निरीक्षक सुरेश झगडे आणि दुय्यम निरीक्षक अंकुश आवताडे यांच्या पथकाने जत सांगोला महामार्गावर सोनंद गावाच्या हद्दीत पहाटेच्या सुमारास गस्त घालताना एका आयशर कंपनीच्या सहाचाकी कंटेनरमधून (एमएच ०४ गीआर-७२३७) गोवा राज्य निर्मित व महाराष्ट्र राज्यात विक्रीस प्रतिबंध असलेल्या विदेशी दारुच्या एकूण ८९० पेट्या जप्त केल्या. दरम्यान, याप्रकरणी कंटेनरचा चालक ज्ञानेश्वर अशोक भोसले (वय ३९ वर्षे, रा. पोखरापूर ता. मोहोळ) याच्याविरुद्ध महाराष्ट्र दारुबंदी कायदा १९४९ च्या कलमांतर्गत गुन्हा नोंदवण्यात आला आहे.
