सातरस्ता येथे तेलविक्रीचा व्यवसाय करणारे संजयभाई (बदललेले नाव) आपल्या कुटुंबीयांसह आग्रीपाडा परिसरात राहतात. त्यांची पुतणी संजना हीसुद्धा त्यांच्यासोबत वास्तव्यास होती. संजनाची ओळख समाजमाध्यमावर साईशसोबत झाली. ओळखीनंतर मैत्री आणि मैत्रीचे रूपांतर प्रेमात झाले. दोघेही नियमितपणे एकमेकांना भेटू लागले. मी आर्थिक अडचणीत असून पैशाची गरज असल्याचे साईशने संजनाला सांगितले. तिने आपल्या आईच्या बँक खात्यातील ७४ हजार रुपये ऑनलाइन ट्रान्सफर काही दिवस गेल्यानंतर संजनाचा आपल्यावर विश्वास बसल्याचे साईशच्या लक्षात आले. अमली पदार्थाचा एक जुना गुन्हा असून, बंद झालेले प्रकरण पोलिसांनी पुन्हा उकरून काढले आहे. हे प्रकरण मिटवले नाही तर पोलिस तुरुंगात टाकतील, असे सांगून त्याने संजनाकडे पैशासाठी विनवणी केली.
साईशला अडचणीत पाहून संजना व्यथित झाली. त्याला देण्यासाठी पैसे नसल्याने तिने कुटुबीयांच्या दागिन्यांकडे मोर्चा वळवला. कधी अंगठी, कधी हार, चेन, कानातले असे थोडेथोडे करून जवळपास २० लाखांचे दागिने तिने साईशला दिले. जानेवारीत संजनाच्या आजीने दागिने पाहण्यासाठी कपाट उघडले. त्यावेळी बरेच दागिने गायब असल्याचे तिने कुटुंबीयांच्या निदर्शनास आणून दिले. कुटुंबीय पोलिसांत जात असल्याचे समजताच संजनाने सर्व प्रकार सांगितला. त्यानुसार आग्रीपाडा पोलिसांनी गुन्हा दाखल करून साईशला अटक केली. त्याने घेतलेले दागिने हस्तगत करण्याचे काम सुरू असल्याचे पोलिसांनी सांगितले.
