वाघाडी ते अर्थ दरम्यान डंपरची प्रवासी वाहतूक करणाऱ्या वाहनाला जोरदार धडक, एक ठार तर आठ गंभीर जखमी

धुळे जिल्ह्यातील शिरपूर तालु्क्यामधील वाघाडी गावाजवळ एक कोळसा वाहतूक करणाऱ्या डंपर आणि प्रवासी वाहतूक करणाऱ्या टाटा मॅजिक वाहनाचा भीषण अपघात झाला आहे. या अपघातात एका १८ वर्षीय तरूणाचा जागीच मृत्यू झाला आहे.

धुळे : दगडी कोळसा वाहतूक करणाऱ्या भरधाव वेगाने येणाऱ्या डंपरने प्रवासी वाहतूक करणाऱ्या चारचाकी टाटा मॅजिक वाहनाला जबर धडक दिल्याची घटना वाघाडी गावाजवळ घडली आहे. या भीषण अपघातात एका युवकाचा जागीच मृत्यू झाला तर सात ते आठ प्रवासी गंभीर जखमी झाले आहेत. जखमी झालेल्यांमध्ये एकाची प्रकृती चिंताजनक आहे.

अपघातात एक तरूण जागीच ठार...

मिळालेल्या प्राथमिक माहितीनुसार, शिरपूर शहादा रस्त्यावरील अर्थे ते वाघाडी गावादरम्यान आश्रमशाळा समोर आज सकाळच्या सुमारास गुजरात राज्यातून दगडी कोळसा घेऊन जाणाऱ्या जीजे २१ वाय ९३०० क्रमांकाच्या डंपरने शहादाकडून शिरपूरच्या दिशेने जात असताना खामखेडा येथून शिरपूरच्या दिशेने जाणाऱ्या प्रवासी वाहतूक करणाऱ्या टाटा मॅजिक या वाहनाला मागच्या बाजूने जोरदार धडक दिली. या घटनेत एक तरुण जागीच ठार झाला आहे.

आठ जखमी, एकाची प्रकृती चिंताजनक...

या घटनेची माहिती मिळताच घटनास्थळी नागरिकांनी धाव घेत रुग्णवाहिका बोलविण्यात आली. या भीषण अपघातात टाटा मॅजिक वाहनातील उमेश राजेंद्र पाटील वय १८ रा खामखेडा या युवकाचा मृत्यू झाला असून प्रमोद नथ्थु शिरसाठ वाहक कविता भगवान वाडीले, गोपाल संतोष पवार, कृष्णा रमेश शिंदे, आकाश बबलु कुराडे, अरुण संतोष वडर, किसन संतोष वडर, संतोष बारकु वडर, भिका महादु धनगर, मनिषाबाई गुजर, आशाबाई गुजर सर्व रा.खामखेडा प्रवासी जखमी झाल्याचे सांगितले जात आहे.

सर्वांना शिरपूर उपजिल्हा रुग्णालयात दाखल करण्यात आले असून जखमींवर उपचार सुरु आहे. या अपघात एकाचा मृत्यू झाला आहे. तर एकाची प्रकृती चिंताजनक असल्याचे सांगण्यात येत आहे.