कल्याण-पश्चिम परिसरात एका कारचे शोरूम आहे. या शोरूममध्ये एक्स्चेंज झालेल्या गाड्या यांच्या दुसऱ्या शोरूममध्ये विक्रीसाठी ठेवल्या जातात. या शोरूममध्ये मॅनेजर पदावर तुषार तांबे, सेल्समन पदावर सुजित जाधव आणि अकाउंट विभागात कार्यरत असलेली एक महिला या तिघांनी आपसात संगनमत करत शोरूममध्ये आलेल्या पंधरा गाड्या परस्पर विकल्या.
या गाड्यांचे पैसे शोरूममध्ये दिले नाहीत. दोन-तीन महिन्यानंतर शोरूम मालकाच्या ही बाब लक्षात आली. त्यांनी तात्काळ चौकशी केली. चौकशीमध्ये या तिघांनी मिळून ४७ लाख ८९ हजार रुपयांचा अपहार केल्याचे लक्षात आलं. शोरूम मालकाने तत्काळ महात्मा फुले पोलीस ठाण्यात धाव घेत या प्रकरणी तक्रार नोंदवली.
तक्रारीनुसार, महात्मा फुले पोलीस ठाण्यात तुषार तांबे, सुजित जाधव आणि कर्मचारी महिला यांच्या विरोधात गुन्हा दाखल करण्यात आला. पोलिसांनी सुजित जाधव सह एका महिलेला अटक केलीये. तर तुषार तांबे फरार असून पोलीस तुषार तांबेचा शोध घेत आहेत
