पीडीत महिलेने पोलिसात दिलेल्या तक्रारीनुसार असे की, जळगाव शहरातील विवाहित महिला ती राहत असलेल्या परिसरातील मंदिरात एक ते दोन दिवसाआड तिच्या जावेसोबत दर्शनाला, तसेच पुजेसाठी जात असते.
यादरम्यान, महिनाभरापासून या मंदिरातील पुजारी राम बालकदास महाराज हा महिलेकडे वाईट नजरेने पाहत होता. याबाबत महिलेने तिच्या पतीजवळ तक्रार केली होती. सोमवारी विवाहित महिला तिच्या जावेसोबत नेहमीप्रमाणे मंदिरात पुजेसाठी गेली. यावेळी तिची जाऊ पुजा करुन मंदिराच्या बाहेर थांबली.
महिला मंदिरात एकटी असताना पुजारी राम बालकदास महाराज हा महिलेजवळ आला.
त्याने तिला सिताराम म्हणण्यास सांगितले. महिला त्याकडे दुर्लक्ष करत बाहेर पडत असतांना पुजाऱ्याने महिलेचा हात धरला आणि तिचा विनयभंग केला. त्यानंतर महिला आरडाओरड करत मंदिराबाहेर उभ्या तिच्या जावेला, तसेच घरी आल्यावर पतीला सांगितली. मंगळवारी पुजारी राम बालकदास महाराज यांच्या विरोधात शहर पोलिसात तक्रार करण्यात आली आहे. त्यावरून पुजाऱ्याविरोधात गुन्हा दाखल करण्यात आला आहे.
