एसटीतून देशी दारूची वाहतूक दारूच्या १२ बाॅक्ससोबत चालक-वाहक ताब्यात

धुळे : चाळीसगाव ते सुरत बसमधून अवैधरित्या दारूची वाहतूक करणाऱ्या चालक आणि वाहक यांना धुळे बस स्थानक पोलिसांनी ताब्यात घेतलं आहे. याची गोपनीय माहिती धुळे बस स्थानकाच्या आगार व्यवस्थापक स्वाती पाटील यांना मिळाली असता त्यांनी टीम सुपरवायझर व धुळे आगारातील सुरक्षा रक्षकांना सोबत घेऊन सदर गाडीची झाडाझडती घेतली. या बसच्या डिक्कीत जवळपास चार पोत्यांमध्ये देशी दारूचे १२ बॉक्स आढळून आले. त्यामुळे तात्काळ धुळे शहर बस स्थानक पोलिसांना बोलवून गाडीतील चालक-वाहकांनसह बसमध्ये मिळालेला मद्यसाठा पोलिसांच्या ताब्यात देण्यात आला आहे.

देशी दारूचे एकूण १२ बॉक्स पोलिसांच्या ताब्यात

चाळीसगाव आगारातून सकाळी ११.३० वाजता निघालेली एमएच २० बीएल ३३७५ क्रमांकाच्या बसमध्ये दारूचे बॉक्स घेऊन जात असल्याची खात्रीलायक माहिती मिळाल्यानंतर धुळे आगार व्यवस्थापक स्वाती पाटील यांनी सदर बसची झाडाझडती घेतली असता त्यामध्ये देशी दारूचे एकूण १२ बॉक्स आढळून आले. सदर बस धुळे डेपोमध्ये उभी करून त्यातील चालक व वाहक यांना चौकशीसाठी शहर पोलीस ठाण्यात नेण्यात आले आहे. दारू कोणी व कुठल्या उद्देशाने बसमध्ये ठेवली आहे की, वाहक व चालक संगनमताने ही दारु तस्करी करत होते की काय? या सर्व गोष्टींचा तपास धुळे शहर पोलीस करत आहेत.

दारू तस्करीमागे कोण? पोलिसांचा तपास सुरू

दुपारी उशिरापर्यंत पोलिसांची कारवाई सुरू होती त्यामुळे पोलिसांनी यासंदर्भात बोलण्यास तूर्तास तरी नकार दिला आहे. मात्र, या दारु तस्करीमागे कोणाचा हात आहे याचा कसून तपास धुळे शहर पोलिस करीत आहे, अशी माहिती धुळे आगार व्यवस्थापक स्वाती पाटील यांनी दिली आहे.