अत्यंत हलाखीच्या परिस्थितीत वयाच्या अवघ्या वयाच्या 24 व्या वर्षी विष्णू कांबळे यांनी हे नेत्रदीपक यश संपादन केले आहे. त्यांचे मूळ गाव मदनसुरी ता. निलंगा आहे. सन 2002 साली घरगुती हिंसाचारामुळे त्यांच्या आईचे निधन झाले. त्यावेळी ते अवघ्या चार वर्षांचे होते. खुनाच्या शिक्षेत आरोपी वडील कारागृहात होते. तेव्हापासून त्यांचा सांभाळ मामा आणि आजी यांनी त्यांच्या आजोळी केला.
सातवीपर्यंतचे शिक्षण त्यांच्या आजोळी जि. प. प्राथमिक शाळा चिंचोली भुयार ता उमरगा येथे झाले. पुढील शिक्षणाची आजोळी सोय नसल्यामुळे लातूर येथील मावशीकडे राहून माध्यमिक शिक्षण पूर्ण केले. सन 2013 साली 90 टक्के घेऊन ते दहावी उत्तीर्ण झाले. परंतु आई नसल्याने व वडील शैक्षणिक कागदपत्रे देण्यास टाळाटाळ व सहकार्य करत नसल्यामुळे पुढील शैक्षणिक प्रवेशासाठी अडचण येत होत्या. परंतु प्रशासकीय अधिकाऱ्यांच्या मदतीने कागदपत्रे मिळवून पुरणमल लाहोटी शासकीय तंत्रनिकेतन (polytechnic) लातूर येथे सिव्हील इंजिनिअरच्या वर्गात त्यांनी प्रवेश घेतला.
सन 2016 साली पॉलिटेक्निक परीक्षा शेवटच्या सत्रात 89 टक्के घेऊन उत्तीर्ण झाले. पुढील Btech शिक्षणासाठी गुरू गोविंद सिंह अभियांत्रिकी विद्यालय नांदेड येथे प्रवेश घेतला. परंतु घरची आर्थिक परिस्थिती बिकट असल्यामुळे समाज कल्याण वसतिगृहात येथे राहून शिक्षण पूर्ण केले.
त्यांना लहानपणापासून प्रशासकीय सेवेत येण्याची आवड होती. त्यामुळे सन 2018 मध्ये त्यांनी कनिष्ठ अभियंता पदाची परीक्षा दिली व राज्यात 10 वा क्रमांक मिळवून सार्वजनिक बांधकाम विभाग (pwd) मध्ये क्लास-2 अधिकारी म्हणून निवड झाली. परंतु क्लास 1 अधिकारी होण्याचे स्वप्न असल्याने नोकरी करत असताना पुन्हा अभ्यास चालू ठेवला. नोकरी करत असताना नोकरीचा ताण होताच त्यासोबत कोविडची ड्युटी करत असताना कोरोना झाला होता. कोरोना काळातही अभ्यासात खंड पडू दिला नाही. दिवसा नोकरी व रात्री अभ्यास असे सूत्र वापरून पूर्व, मुख्य व मुलाखत असे परीक्षेचे तीन टप्पे पार करून एमपीएससी परीक्षा पास होऊन सहाय्यक कार्यकारी अभियंता (क्लास -१ pwd) पदी निवड झाली आहे.
