याप्रकरणी हसनाबाद पोलिसांनी मृत महिलेचा पती इम्रान महेमुद, सासू, सासरा, नणंद, नणंदजावई यांच्याविरोधात गुन्हा दाखल केला आहे. मिळालेल्या माहितीनुसार, हसनाबादमधील कुरेशी मोहल्ला भागात राहत्या घरात 31 मे रोजी नुसरत महेमूद या महिलेचा मृतदेह आढळून आला होता. नुसरतने आपल्या पतीचे अनैतिक संबध असल्याची तक्रार माहेरच्या लोकांकडे केली होती. इतकंच नाही तर, तिने पतीच्या अनैतिक संबंधांची ऑडीओ क्लीप माहेरच्या लोकांना पाठवली होती.
याचा राग मनात धरून नुसरत वेड्यासारखी करते, असं म्हणत सासरच्या मंडळींनी तिला दर्ग्यात नेऊन तिच्या तोंडात लिंबू कोंबून तिला मारहाण केली. तसेच तिची हत्याही केल्याचा आरोप नुसरतच्या नातेवाईकांनी केला आहे. इतकंच नाही तर, नुसरतचा पती व्यवसायासाठी एक लाखांची मागणी करत होता, असा आरोपही नुसरतच्या नातेवाईकांनी केला.
विशेष बाब म्हणजे, दोन महिन्यांपूर्वीच नुसरतचा विवाह झाला होता. विवाहानंतर एक महिना तिला चांगली वागणूक दिली. नंतर मात्र तिचा हुंड्यासाठी छळ सुरु झाला. अशी तक्रार हसनाबाद पोलीस ठाण्यात देण्यात आली आहे. घरात नुसरतचा मृतदेह आढळून आल्यानंतर नंतर शवविच्छेदनसाठी हसनाबादमधीलच प्राथमिक आरोग्य केंद्रात आणण्यात आला. यावेळी नातेवाईकांनी गर्दी केल्याने मोठा तणाव निर्माण झाला होता.
अखेर नुसरतच्या माहेरच्या नातेवाईकांनी हसनाबाद पोलीस ठाण्यात रीतसर तक्रार दिल्यानंतर पोलिसांनी मयत महिलेचा पती इम्रान महेमुद,सासू,सासरा,नणंद, नणंदवई यांच्या विरोधात गुन्हा दाखल केला आहे. या प्रकरणाचा पुढील तपास हसनाबाद पोलीस करत आहेत.
