घरात २१ वर्षांनी पाळणा हलणार म्हणून सगळेच आनंदात होते. मात्र एका घटनेने पूर्ण कुटुंबावर दुखाचा डोंगर कोसळला आहे. नाशिकमध्ये घडलेल्या या घटनेने हळहळ व्यक्त केली जात आहे.
घरात भोवळ येऊन पडल्याने गर्भवतीसह जुळ्या बाळांचा दुर्दैवी मृत्यू झाला आहे. विशेष म्हणजे कुटुंबात तब्बल २१ वर्षांनी पाळणा हलणार होता. मात्र, एका क्षणातच होत्याचे नव्हते झाले. पाथर्डी फाटा येथील या हृदयद्रावक घटनेने सर्वत्र हळहळ व्यक्त होत आहे
याबाबत पोलिसांनी दिलेल्या माहितीनुसार, पूजा देवेंद्र मोराणकर (वय ४५) असे मृत्युमुखी पडलेल्या गर्भवतीचे नाव आहे. पाथर्डी फाटा परिसरात मोराणकर कुटुंब राहत असून, शुक्रवारी सकाळी पूजा आपल्या घरातील कामे करीत होत्या. घरातील कामे आवरण्यासाठी त्या बाथरूममध्ये गेल्या. बाथरूममधून बाहेर आल्यानंतर त्यांना अचानक भोवळ आली आणि घरातच कोसळल्या. या वेळी घरात वडील रमेश चिंतामण पाखले आणि बहीण होती.
पूजा जमिनीवर कोसळल्याचे पाहून पाखले यांनी तातडीने पाथर्डी फाटा येथील वक्रतुंड रुग्णालयात पूजा यांना दाखल करण्यासाठी गेले. मात्र, जिना चढत असतानाच त्यांना पुन्हा भोवळ आली आणि त्या जागीच कोसळल्या. या वेळी पूजा यांच्यासह त्यांच्या गर्भातील जुळ्या बाळांचा मृत्यू झाला. या घटनेने मोराणकर आणि पाखले कुटुंबीयावर दुःखाचा डोंगर कोसळला आहे. या प्रकरणी इंदिरानगर पोलिस ठाण्यात नोंद करण्यात आली आहे.
