इरकॉन सोमा टोल वे प्रा.लि. नवी दिल्ली या कंपनीने नॅशनल हायवे अॅथोरिटी ऑफ इंडीया यांच्याकडुन दि.28 सप्टेंबर 2005 रोजी बांधा, चालवा व हस्तांतरीत करा, या तत्वावर करारनामा केला आहे. सदर कंपनीने कोरल असोसिएटस (उदयपुर, राजस्थान) या कंपनीस दि.22 ऑगस्ट 2022 रोजी नॅशनल हायवे क्र.3 (मुंबई-आग्रा) यावर असलेला चांदवड (जि.नाशिक) येथील टोल प्लाझाचे संपुर्ण व्यवस्थापन करण्याचा करारनामा केला आहे.
सदर कंपनीने तकारदार यांना दि. 25 ऑगस्ट 22 रोजी मुखत्यार पत्राव्दारे टोल प्लाझा, चांदवडचे संपुर्ण व्यवस्थापन व त्या संबंधी कागदोपत्राचे अधिकार प्रदान केले आहेत. तक्रारदार यांनी कोरल असोसिएटस कंपनीने चांदवड टोल प्लाझाच्या व्यवस्थापना बद्दलचे डिसेंबर 2022 ते जानेवारी 2023 चे रिअॅम्बर्समेंन्ट रक्कम अदा करण्यासाठी व कोरल असोसिएटसने धुळे लळिंग टोल प्लाझा व्यवस्थापनाचा ठेका मिळण्यासाठी भरलेली निविदा मंजुर करण्यासाठी तकारदार यांच्याकडे दि.19 फेब्रुवारी रोजी धुळे लळिंग इरकॉन सोमा टोल वेचे मुख्य कार्यालयात फायनान्स अधिकारी हरिष सत्यवली यांनी स्वतः साठी 2 लाख रूपये व इरकॉन सोमा टोल वे प्रा.लि. नई दिल्लीचे संचालक प्रदिप कटीयार यांच्यासाठी 5 लाख रूपयांची मागणी केली. याबाबत तक्रारदार यांनी आज दि.21 रोजी लाचलुचपत प्रतिबंधक विभाग, धुळे कार्यालयात तक्रार दिली होती.
तक्रारीची आज पडताळणी केली असता त्यादरम्यान इरकॉन सोमा टोल वे प्रा. लि. नवी दिल्ली या कंपनीचे संचालक प्रदिप कटीयार यांनी मोबाईलव्दारे सांगितल्या वरुन कंपनीचे फायनान्स अधिकारी हरिष सत्यवली यांनी तक्रारदाराकडे स्वत: करिता 2 लाख व संचालक कटीयार यांच्याकरिता 5 लाख असे एकुण 7 लाखांची मागणी केली. तसेच लाचेची रक्कम त्यांनी इरकॉन सोमा टोल वे प्रा. लि. कंपनीच्या धुळे लळिंग टोल प्लाझा जवळील मुख्य कार्यालयात स्विकारतांना त्यांना रंगेहात पकडण्यात आले. याप्रकरणी दोघांविरूध्द गुन्हा दाखल करण्यात आला आहे.
कारवाई लाचलुचपत प्रतिबंधक धुळे विभागाचे पोलीस उपअधीक्षक अनिल बडगुजर यांच्या मार्गदर्शनाखाली पोलीस निरीक्षक प्रकाश झोडगे, पोलीस निरीक्षक मंजितसिंग चव्हाण तसेच राजन कदम, शरद काटके, संतोष पावरा, भुषण खलाणेकर, भुषण शेटे, गायत्री पाटील, रोहीणी पवार, रामदास बारेला, सुधीर मोरे, जगदीश बडगुजर, प्रशांत बागुल, मकरंद पाटील यांनी केली आहे.
