जळगाव जिल्हा बँकेच्या अध्यक्षपदी अजित पवारांचे समर्थक संजय पवार यांची वर्णी लागली आहे. त्यामुळे राष्ट्रवादीचे नेते एकनाथ खडसे यांना मोठा धक्का बसला आहे. अध्यक्षपदाच्या निवडणुकीत राष्ट्रवादीत बंडखोरी झाली. त्यामुळे राष्ट्रवादी काँग्रेसचे उमेदवार ॲड रवींद्र पाटील यांचा धक्कादायक पराभव झाला.
या निवडणूकीत राष्ट्रवादीचे बंडखोर उमेदवार संजय पवार यांचा विजय झाला. दुसरीकडे जळगाव जिल्हा बँकेच्या उपाध्यक्षपदी शिंदे गटाचे उमेदवार अमोल पाटील बिनविरोध झाली आहे. या धक्कादायक निकालानंतर महाविकास आघाडीत गद्दारी झाल्याची प्रतिक्रिया एकनाथ खडसे यांनी दिली आहे.
दरम्यान, जळगाव जिल्हा मध्यवर्ती सहकारी बँकेत महाविकास आघाडी व शिवसेना (शिंदे गट) यांची संयुक्त सत्ता होती. राष्ट्रवादी कॉंग्रेसचे दहा, शिवसेना शिंदे गटाचे पाच, कॉंग्रेसचे तीन, शिवसेना ठाकरे गटाचे दोन, तर भाजपचा एक सदस्य आहे. जिल्ह्याचे पालकमंत्री गुलाबराव पाटील शिंदे गटाचे आहेत. तर ग्रामविकास मंत्री गिरीश महाजन भाजपचे आहेत, तर राष्ट्रवादी कॉंग्रेसचे आमदार एकनाथ खडसे यांच्याकडे बँकेचे नेतृत्व आहे
