मकोकां’तर्गत तुरुंगात असलेल्या मित्राला जामिनावर बाहेर काढण्यासाठी पैशांची गरज असल्याने चोरी करणाऱ्या तीन आरोपींना पोलिसांनी अटक केली आहे
म्हणून केली चोरी...
आरोपींबरोबर असलेल्या चार अल्पवयीन साथीदारांना ताब्यात घेण्यात आले आहे. आरोपींकडून ३७ हजार रुपयांची रोकड जप्त करण्यात आली आहे.हसन मगदुम बादशाह ईटगी (१८, रा. कात्रज), तेजस दीपक सणस ऊर्फ चिक्या (वय १९, रा. कात्रज) आणि आदित्य राजू नाडे (वय १८, रा. कोथरूड) अशी अटक करण्यात आलेल्यांची नावे आहेत. ऋषीकेश गाडे ऊर्फ हुक्या हा आरोपी सध्या ‘मकोकां’तर्गत तुरुंगात आहे. त्याला जामिनावर बाहेर काढण्यासाठी आरोपींनी चोरी केल्याचे समोर आले आहे.
अशी आहे घटना
पोलिसांनी दिलेल्या माहितीनुसार, २६ एप्रिल रोजी मध्यरात्री कात्रज-कोंढवा रस्त्यावरील शत्रुंजय जैन मंदिर येथे चोरीची घटना घडली होती. मंदिराचे व्यवस्थापक राजकुमार बन्सीलाल राजपुत यांनी या प्रकरणी फिर्याद दिली होती. पोलिसांकडून तपास सुरू असतानाच आरोपी इस्कॉन मंदिराच्या पाठीमागील पाण्याच्या टाकीजवळ थांबल्याची माहिती तपास पथकाला मिळाली. त्यानुसार पथकाने सापळा रचून एकाला ताब्यात घेतले. त्याच्याकडे केलेल्या चौकशीत त्याने साथीदारांच्या मदतीने मंदिरातील दानपेट्या फोडल्याची कबुली दिली. त्यानंतर पोलिसांनी त्याला आणि साथीदारांना अटक केली. चार अल्पवयीन तरुणांना ताब्यात घेऊन त्यांच्याकडून ३७ हजार २१२ रुपये जप्त केले
परिमंडळ पाचचे पोलिस उपायुक्त विक्रांत देशमुख यांच्या मार्गदर्शनाखाली कोंढवा पोलिस ठाण्याचे वरिष्ठ निरीक्षक संतोष सोनवणे, गुन्हे निरीक्षक संजय मोगले, संदीप भोसले, उपनिरीक्षक स्वप्नील पाटील, अंमलदार सूरज शुक्ला, अनिल बनकर, सतीश चव्हाण, नीलेश देसाई, गोरखनाथ चिनके, ज्योतीबा पवार यांच्यासह पथकाने ही कारवाई केली
