मुंबईत स्वतःच्या हक्काचं घर असावं, या लालसेपोटी एका केअर टेकरने वयोवृद्ध दाम्पत्याच्या घरात डल्ला मारला. चोरट्याने तब्बल एक कोटी ३८ लाख रुपये किमतीचा मुद्देमाल लंपास केल्याचा आरोप आहे. हा प्रकार मुंबई शहरातील मुलुंड परिसरामध्ये घडल्याचे समोर आला आहे
अमित वामने असं ४० वर्षीय आरोपीचं नाव आहे. मुलुंड मधील कारिया या वृद्ध दाम्पत्याकडे तो गेल्या सहा वर्षांपासून केअरटेकर म्हणून काम करत होता. सहा महिन्यांपासून त्याने त्यांच्या घरामध्ये चोरी करण्याचा कट रचला होता. यासाठी त्याने त्यांच्या फ्लॅटची डुप्लिकेट चावी देखील बनवून ठेवली होती.
१० एप्रिल ते १८ एप्रिलच्या दरम्यान कारिया दाम्पत्य हे हॉस्पिटलमध्ये असताना अमितने याच संधीचा फायदा घेतला. इमारतीच्या वॉचमनशी संगनमत केलं. दहा तारखेला वॉचमनला इमारतीचे सीसीटीव्ही बंद करायला सांगितले.
इमारतीत शिरून अमितने कारिया कुटुंबीयांचा फ्लॅट उघडला. बेड जवळ असलेल्या चावीने कपाटाचे दरवाजे उघडले आणि कपाटातील सोने, चांदी, हिरे आणि दोन लाख रुपयांची रोख रक्कम असा मिळून एक कोटी ३८ लाख रुपये किमतीचा मुद्देमाल घेऊन तो फरार झाला
१८ तारखेला कारिया कुटुंबीय घरी आल्यानंतर त्यांनी एके दिवशी कपाटाची चावी शोधण्याचा प्रयत्न केला परंतु त्यांना चावी मिळाली नाही म्हणून त्यांनी चावीवाल्याकडून डुप्लिकेट चावी बनवून कपाट उघडले असता कपाटात ठेवलेल्या सोन्या चांदीच्या वस्तू आणि पैसे गायब असल्यास त्यांच्या निदर्शनास आले. त्यांनी मुलुंड पोलिसात तक्रार केली
२८ एप्रिल रोजी ही तक्रार दाखल करण्यात आली होती. त्यानंतर दोन दिवसात पोलिसांनी कारिया यांच्या घरातील नोकरांची आणि या केअरटेकरची चौकशी केली, पोलिसी खाक्या दाखवताच केअरटेकरने आपणच ही चोरी केल्याची कबुली दिली. अमित वामने हा सध्या अटकेत असून त्याचा साथीदार वॉचमन सध्या फरार आहे. त्याचा शोध मुलुंड पोलीस घेत आहेत.
