किरकोळ वादातून लहान भावाने आपल्या मोठ्या भावाचा निर्घृणपणे खून केला. दादाच्या डोक्यात लाकडी दांडका टाकून धाकट्याने त्याचा जीव घेतला. ही घटना नाशिक शहरातील कामटवाडे परिसरात असलेल्या गोपाल चौक येथे घडली आहे. या घटनेने परिसरात एकच खळबळ उडाली आहे. सदाशिव दामू निकम (वय ५५ वर्ष) असे या घटनेत मृत्यू झालेल्या मोठ्या भावाचे नाव आहे. या प्रकरणी पोलीस ठाण्यात गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार संशयित आरोपी हरी दामू निकम (वय ५० वर्ष) हा गुरुवार ४ मे रोजी रात्री साडेदहा वाजेच्या सुमारास मद्यपान करून घरी आला. मोठा भाऊ सदाशिव निकम यांना तो शिवीगाळ करू लागला, त्याचा जाब विचारला असता संशयित आरोपी हरी दामू निकम याने आपल्या सख्ख्या मोठ्या भावाच्या डोक्यात लाकडी दांड्याने जबर मारहाण करण्यास सुरुवात केली. या घटनेत सदाशिव निकम हे गंभीर जखमी झाले होते
यानंतर त्यांना उपचारासाठी त्वरित जिल्हा रुग्णालयात दाखल करण्यात आले, परंतु डॉक्टरांनी त्यांना तपासून मयत घोषित केले. दरम्यान घटनेची माहिती मिळताच अंबड पोलीस ठाण्याचे अधिकारी व कर्मचारी घटनास्थळी दाखल झाले. या प्रकरणी बायडी कैलास सूर्यवंशी (राहणार गोपाल चौक) यांनी अंबड पोलीस ठाण्यात दिलेल्या तक्रारीवरून संशयित आरोपी हरी दामू निकम यांच्या विरोधात गुन्हा दाखल करण्यात आला आहे, तर संशयित आरोपी यास पोलिसांनी ताब्यात घेतले आहे. या प्रकरणाचा पुढील तपास अंबड पोलीस करीत आहेत
दरम्यान, सिडकोच्या कामटवाडी परिसरात गुरुवारी रात्रीच्या सुमारास दोघे भावांमध्ये शाब्दिक चकमक झाली. त्यानंतर त्याचे रूपांतर हाणामारीत झाले. या हाणामारीत लहान भावाने मोठ्या भावाच्या डोक्यात लाकडी दंडुका टाकल्याने त्याचा मृत्यू झाला. मयत सदाशिव निकम यांच्या पश्चात तीन मुले व दोन मुली असा परिवार आहे.
