खोडद (ता. जुन्नर) येथील तेलओढा परिसरात एका व्यक्तीचा मारहाण करून खून करण्यात आला. ही घटना गुरुवारी रात्री उघडकीस आली. मात्र, मृताची ओळख पटवण्यासाठी त्याचे फोटो नारायणगाव पोलिसांनी समाजमाध्यमावर टाकले असता मृत व्यक्ती जेसीबीचालक असून, त्याचे नाव साहेबराव भुतांबरे (वय ४५, मूळ गाव रा. कोतुळ, अकोला, जि. नगर, सध्या रा. पाटेखैरे मळा, नारायणगाव) आहे. छायाचित्रावरून नातेवाइकांमुळे त्याची ओळख पटली.
हा खून कोणी केला, याचा तपास पुणे ग्रामीण पोलिस अधीक्षक अंकित गोयल यांच्या मार्गदर्शनाखाली नारायणगाव पोलिस; तसेच स्थानिक गुन्हे अन्वेषण विभागाने सुरू केला. त्यात मृत व्यक्तीला दोघे जण घेऊन गुरुवारी रात्री खोडद रस्त्याच्या दिशेने चालत जाताना पाहिल्याची माहिती पोलिसांना मिळाली. त्यावरून शोध घेतला असता मृताचे मित्र प्रियाल ऊर्फ बंटी खरमाळे (वय ३१, रा. अमरवाडी, खोडद) आणि देवराम कोकाटे (वय २७, रा. कुंभारआळी, खोडद) यांना पोलिसांनी ताब्यात घेतले.
पोलिस चौकशीत दोघांनी खुनाची कबुली दिल्याचे नारायणगावचे सहायक पोलिस निरीक्षक पृथ्वीराज ताटे आणि स्थानिक गुन्हे अन्वेषण विभागाचे निरीक्षक अविनाश शिळीमकर यांनी सांगितले. अनैतिक संबंधांतील व्यवहारातून घडलेल्या आर्थिक व्यवहारातील वादातून त्यांनी हा खून केल्याचे निष्पन्न झाले आहे.
