धुळे: शहरातील एका घरात कुजलेला मृतदेह आढळून आला. घरमालक बाहेरगावी गेल्याने चोरीच्या उद्देशाने व्यक्ती आतमध्ये शिरला असावा. मात्र चोरी करतानाच तो दगावला असावा असे तर्कवितर्क काढण्यात येत आहेत. महिन्याभरापासून घर बंद असल्याने त्याचा मृतदेह तिथेच कुजला. महिन्याभरानंतर घटना उघडकीस आल्याने परिसरात एकच खळबळ उडाली आहे.
धुळे शहरातील ग.नं. ५ मधील सोन्या मारोती मंदिर परिसरात राहाणाऱ्या चंपावती काशीनाथ तारगे या ७५ वर्षीय वृद्धेचे दुमजली लाकडी घर आहे. त्या गेल्या महिन्यापासून इगतपुरी येथे बहिणीच्या नातवाच्या लग्नानिमित्त गेलेल्या होत्या. त्यांच्या बंद घरातून दुर्गंधी येत असल्याची तक्रार आजूबाजूच्या लोकांनी त्यांच्याकडे केली होती. घर बंद असल्याने कुठला तरी प्राणी मेला असावा असा अंदाज व्यक्त करण्यात येत होता.
काल सायंकाळी चंपावती तारगे धुळ्यात परतल्या. त्यांनी बंद घर उघडले असता त्यांना घराच्या मागील बाजूने उग्र वास येऊ लागला. त्यामुळे त्यांनी आज सकाळी साफसफाई करण्यासाठी एका सफाई कर्मचाऱ्याला बोलाऊन घेतले. हा सफाई कर्मचारी घरात शिरला असता तो समोरील दृश्य बघून सरळ बाहेर पळत सुटला. कारण घराच्या वरच्या मजल्याच्या छतावर एक मृतदेह अडकला होता. मृतदेहाचा एक पाय निखळून खाली जमिनीवर पडलेला होता. सदर मृतदेह पूर्णत: कुजलेला होता. हे भयाण दृश्य बघून घर मालकीण तारगे व नागरिकांचा थरकाप उडाला. या प्रकाराची माहिती आझाद नगर पोलिसांना दिली असता पीएसआय अक्षय मोरे, चंद्रकांत पाटील, अविनाश लोखंडे, संतोष घुगे दाखल झाले.
सदर इसम हा चोरीच्या इराद्याने घरात शिरल्याचा पोलिसांचा संशय आहे. घर जुन्या पद्धतीचे असल्याने फळी तुटून त्याचा पाय अडकला अन् त्याच्या गुप्तांगाला जबर मार बसला असावा किंवा शॉक लागून त्याचा मृत्यू झाला असावा, असे तर्क उपस्थितांनी लढविले. मृतदेह महिनाभरापासून कुजलेला असल्याने त्याची ओळख पटविणे अशक्य बनले आहे. पोलिसांनी मृतदेह ताब्यात घेवून उत्तरीय तपासणीसाठी हिरे रुग्णालयात रुग्णवाहिकेने रवाना करण्यात आला. सदर घटनेमुळे पेठ बाजार परिसरात एकच खळबळ माजलेली असून दुपारी उशिरापर्यंत मृतदेहाचीच चर्चा रंगलेली होती
