कल्याण: कल्याण पश्चिमेत रिक्षातून प्रवास करणाऱ्या एका डॉक्टरला रिक्षाचालक आणि त्याच्या साथीदारांनी लुटल्याची घटना घडली आहे. त्यांनी ओळख काढत पार्टीच्या नावाखाली त्याला बेधुंद होईपर्यंत दारू पाजली. यानंतर त्याला लुटले. या प्रकरणी कल्याण बाजारपेठ पोलिसांनी गुन्हा दाखल केला आहे. तसेच २४ तासांच्या आत चारही आरोपींना बेड्या ठोकल्या आहेत. कैंसर मलंग शहा, साबिर इमाम शेख, उर्फ दूरी, ,नमिर नईम शेख, सलीम अकबर शेख, अशी या आरोपींची नावे आहेत. या आरोपींकडून एक १३ ग्रॅम वजनाची सोन्याची चैन, दोन मोबाईल, दोन ऑटो रिक्षा आणि २३,०००/- रु. रोख रक्कम असा २,०३,००० रुपयांचा मुद्देमाल पोलिसांनी जप्त केला आहे.
मिळालेल्या माहितीनुसार, कल्याण पश्चिम खडकपाडा परिसरात राहणारे डॉ. जवाहरलाल चिलगर यांनी कल्याण स्टेशनच्या बाहेरून खडकपाडा येथे जाण्याकरिता रिक्षा केली. यावेळी रिक्षाचालक आणि त्याच्यासोबत आधीच दोन जण त्या रिक्षात बसलेले होते. रिक्षा चालू झाल्यानंतर या दोन्ही जणांनी डॉ. चिलगर यांना गोड बोलुन पार्टी करण्याचे आमिष दाखविले. त्यांना दारू पाजून आणि गोड बोलुन त्यांच्याकडील मोबाईल, सोन्याची चैन, ५,०००/- रू रोख रक्कम काढुन घेतली. इतकेच नाही तर यांच्या मोबाईलमधुन गुगल पे अॅपमधुन ७३,०००/- रू काढुन घेतले.
त्यानंतर डॉक्टरला बेधुंद अवस्थेत डोंबिवली परिसरात सोडून तेथून पळ काढला. जेव्हा डॉ. जवाहरलाल चिलगर हे शुद्धीत आले, तेव्हा त्यांना आपली परिस्थितीची जाणीव झाली. तसेच आपल्याजवळील वस्तू नसल्याचे निदर्शनात आले. यानंतर डॉ. जवाहरलाल चिलगर यांनी जवळील पोलीस ठाण्यात गुन्हा दाखल केला. फसवणुकीचा गुन्हा दाखल होताच या गुन्ह्याचे गांभीर्य लक्षात घेऊन कल्याण झोन 3 चे पोलीस उप आयुक्त सचिन गुंजाळ, सहायक पोलीस आयुक्त सुनिल कुन्हाडे, , बाजारपेठ पोलीस ठाण्याचे वरिष्ठ अधिकारी सुनिल पवार, एपीआय सुजित मुंढे, एएसआय सुरेश पाटील ,अजिंक्य मोरे, पावशे पोलीस कर्मचाऱ्यांची तीन टीम करून आरोपीचा शोध सुरू केला होता.
यादरम्यान तांत्रिक बाबी आणि गुप्त माहितीच्या आधारे बाजारपेठ पोलिसांनी यातील मुख्य आरोपी कैसर शहा याला २४ तासांच्या आत औरंगाबादमधून अटक केली. त्याची विचारणा केली असता त्याने कल्याणमध्ये राहणाऱ्या त्याच्या साबिर इमाम शेख उर्फ दूरी, नमिर नईम शेख, सलीम अकबर शेख यांची नावे सांगितली. त्यानंतर पोलिसाच्या टीमने या तिघांनाही कल्याणमधून ताब्यात घेतले. या चारही आरोपीकडून गुन्ह्यात गेलेल्या वस्तूंपैकी एक १३ ग्रॅम वजनाची सोन्याची चैन, एक रेडमी कंपनीचा मोबाईल फोन, एक सॅमसंग कंपनीचा मोबाईल फोन, दोन ऑटो रिक्षा व २३,०००/- रु. रोख रक्कम असा २,०३,००० /- रूपयाचा मुद्देमाल जप्त करत पुढील तपास सुरू आहे.
