जळगाव: शहरातील रामेश्वर कॉलनीमध्ये राहणाऱ्या विशाखा शालिक पवार या इयत्ता अकरावीच्या विद्यार्थ्यिनीने गळफास घेऊन आत्महत्या केली. ही घटना शनिवारी संध्याकाळी उघडकीस आली आहे. बहीण कुठे आहे? म्हणून भावाने घराचा दरवाजा उघडताच त्याला बहीण गळफास घेतलेल्या अवस्थेत दिसली. रामेश्वर कॉलनीमध्ये पवार कुटुंबीय एका शाळा परिसरात काम करून त्याच ठिकाणी असलेले एका लहान खोलीमध्ये राहत होते.
शाळेत काम करणाऱ्या आणि दिवसा मोल मजुरी करणाऱ्या शालिक पवार यांच्याकडे दुपारी शिक्षकांनी शाळा बंद झाल्यानंतर चावी दिली. त्यानंतर पवार आणि त्यांची पत्नी कामासाठी बाहेर निघून गेले. त्यादरम्यान घरी एकटीच असलेल्या विशाखाने खोलीचा दरवाजा उघडून त्याला केवळ दगड लावला. त्यानंतर तिने खोलीमध्ये गळफास घेतला. बहिण कुठे आहे म्हणून भाऊ शोध घेत होता. दरवाज्याला कडी नसल्याने त्याने तो उघडून बघितला असता त्याला विशाखा ही गळफास घेतलेला अवस्थेत दिसली. बहिणीचा मृतदेह बघून भावाने एकच आक्रोश केला.
मृत विशाखा ही गळफास घेतलेल्या अवस्थेत असल्याने भाऊ आक्रोश करत बाहेर आला. त्यावेळी आजूबाजूच्या नागरिकांच्या मदतीने विशाखाला शासकीय वैद्यकीय महाविद्यालय रुग्णालयात नेण्यात आले. तेथे डॉक्टरांनी तिला मयत घोषित केले. विशाखा ही इयत्ता अकरावीची विद्यार्थिनी असून तिने आत्महत्या का केली याचे कारण समजू शकले नाही.
