कामाची बिल पास करण्यासाठी कंत्राटदाराकडून लाच घेताना महिला सचिवाला एसीबीने रंगेहाथ पकडल्याची घटना घडली आहे. बिल पास करण्यासाठी कंत्राटदाराकडून १२ हजार रुपयांची लाच घेणाऱ्या सावनेर तालुक्यातील खानगाव ग्रामपंचायतीच्या महिला सचिवाला (ग्रामसेवक) लाचलुचपत प्रतिबंधक विभागाने (एसीबी) सोमवारी रंगेहाथ अटक केली. रत्नमाला लोकसिंग हिरापुरे (वय ४२) असे अटकेतील या सचिवाचे नाव आहे.
कंत्राटदाराने खानगाव ग्रामपंचायतीमधील कचराकुंडीचे, अंगणवाडीमधील सिमेंट गट्टू बसविणे तसेच गावातील सांडपाणी वाहून नेण्यासाठी पाइपलाइन टाकण्याचे काम केले. या कामांचे चार लाख रुपयांचे बिल मंजूर करण्यासाठी हिरापुरे यांनी कंत्राटदाराला पाच टक्क्यांप्रमाणे २० हजार रुपयांची मागणी केली. कंत्राटदाराने आठ हजार रुपये दिले. उर्वरित १२ हजार रुपयांसाठी हिरापुरे यांनी कंत्राटदाराकडे तगादा लावला. कंत्राटदाराने लाचलुचपत प्रतिबंधक विभागाकडे तक्रार केली.
अधीक्षक राहुल माकणीकर, अपर अधीक्षक संजय पुरंदरे यांच्या मार्गदर्शनाखाली निरीक्षक प्रवीण लाकडे, त्यांचे सहकारी सारंग बालपांडे, हेडकॉन्स्टेबल अस्मिता मेश्राम, गीता चौधरी, राजू जांभुळकर यांनी खानगाव ग्रामपंचायतीत सापळा रचून हिरापुरे यांना अटक केली. त्यांच्याविरुद्ध केळवद पोलिस ठाण्यात लाचलुचपत प्रतिबंधक कायद्यान्वये गुन्हा दाखल करण्यात आला आहे
